كوروناۆيرۋس: عالىمدار ۆاكسينانى سىناۋ مەرزىمىن قىسقارتۋدىڭ سالدارىن ايتتى

ونىڭ ايتۋىنشا، ۆاكسينانىڭ سوڭعى فازاسىندا - ومىردە ادامعا سالىناتىن مەرزىمىن قىسقارتۋ نۇسقاسى بار. ءبىراق ول ءتۇرلى پروبلەماعا اكەپ سوعۋى مۇمكىن.

«ۆاكسينانى تەزىرەك سىناپ كورەتىن نۇسقاسى - بۇل ۆاكسينانى ادامعا سالىپ كورەتىن سىناقتىڭ ءۇشىنشى كەزەڭىن الماستىرۋ. جۇقتىرۋ قاۋپى جوعارى جەرلەردە جۇمىس ىستەيتىندەر، مىسالى دارىگەرلەر مەن مەدبيكەلەر، سىناققا قاتىسۋعا كەلىسىم بەرىپ، قول قويادى. ال عالىمدار بۇل ۆاكسينا قالاي جۇمىس ىستەيتىنىن قاداعالاپ وتىرادى. مۇمكىن ادام دەنساۋلىق جاعدايىن بەلگىلەپ وتىراتىن موبيل قوسىمشا ارقىلى جاساۋى كەرەك شىعار»، - دەيدى بارانوۆا.

ول ادەتتە ۆاكسينانى سىناعان كەزدە ەرىكتىلەردىڭ ءبىر توبىنا ۆاكسينا، ال ەكىنشى توبىنا فيزيولوگيالىق ەرىتىندى ەگەتىنىن ايتتى. دارىگەرلەر دە، سىناققا قاتىسۋشىلار دا كىمگە ۆاكسينا، كىمگە جاي ەرىتىندى سالىنعانىن بىلمەيدى. ەرىكتىلەر ۇيىنە كەتەدى جانە كادىمگى ءومىرىن جالعاستىرادى. كوروناۆيرۋس جۇقتىرۋ قاۋپى بار جەرلەرگە دە بارا بەرەدى. ال عالىمدار ولاردىڭ قالاي اۋىرىتانىن جانە ونىڭ قانداي فورمادا بايقالاتىنىن باقىلايدى.

بيولوگ ۆاكسينانى ازىرلەگەن كەزدە ءبىرىنشى كەزەڭدە پرەپاراتتىڭ دوزاسى مەن ەگۋ سحەماسى انىقتالاتىنىن ءتۇسىندىردى.

«مۇمكىن ول ءبىر رەت، مۇمكىن ەكى رەت ەگىلەتىن شىعار. قاي نۇسقاسى جاقسى بولسا، سونى تاجىريبەدە پايدالانادى. قوسىمشا ۆاكسيناتسيالاۋ (بۋستەر) يممۋنيتەتتىڭ مىقتى بولىپ، ۇزاق ۋاقىت ۆيرۋسقا تويتارىس بەرۋىنە كومەكتەسەدى، ءبىراق ونىڭ «لوگيستيكاسى» قيىنداۋ بولادى»، - دەدى بارانوۆا.

عالىم ۆاكسينانى سىناۋدىڭ ءۇشىنشى كەزەڭىنە جارتى جىلداي ۋاقىت كەرەك دەپ بولجادى.