ەكى اي بويى بالالارىمدى كورمەدىم - ب ۇ ۇ جاڭالىقتارىنا شىققان الماتىلىق دارىگەر
قازىر اتالعان پەرزەنتحانا COVID-19 جۇقتىرعان ايەلدەردى بوساندىراتىن جالعىز ينفەكتسيالىق ستاتسيونارعا اينالعان. سوندىقتان بۇل اۋرۋحاناعا اقپان ايىنان باستاپ ەكى ەسە جۇكتەمە تۇسكەن.
باسقا پەرزەنتحانالاردان ەرەكشەلىگى مۇندا حيرۋرگ، نيەۆروپاتولوگ، رەانيماتولوگ، كارديولوگ دەگەن سياقتى ماماندار، م ر ت، ك ت بارلىعى بار. باسقا پەرزەنتحانالار مۇنداي مامانداردى سىرتتان شاقىرادى.
«اقپان ايىندا ءبىزدىڭ پەرزەنتحاناعا قالالىق قوعامدىق باسقارما وكىلدەرى كەلىپ جينالىس وتكىزدى. ناۋرىزدان باستاپ ءبىزدىڭ اۋرۋحانا COVID-19 ستاتسيونارى بولادى دەپ ايتتى. بۇكىل قالا بويىنشا ۆيرۋس جۇقتىرعان جۇكتى ايەلدەر وسى جەردەن بوساندىرىلاتىن بولدى. ءبىزدى ەشكىم ماجبۇرلەگەن جوق. تاڭداۋ قۇقىعى بولدى. باسقا جاققا اۋىسۋىمىزعا ەشكىم قارسىلىق بىلدىرمەدى. ءبىراق، پەرزەنتحانا ۇجىمى ءبىراۋىزدان ەشقايدا اۋىسپايمىز دەپ شەشتىك. ەلگە تونگەن ىندەتتى تەك اۋىزبىرشىلىك جەڭە الادى دەپ ويلايمىن. اۋىر جۇمىستان ءبىز دە قاشساق، باسقالار دا قاشسا، العى شەپتە كىم قالادى؟»، - دەدى التىناي قاراعويشيەۆا.
سول جينالىستان سوڭ بولىمشەدە دايىندىق باستالعان.
«بارلىعىمىزعا ينفەكتسيونيستەر، ەپيدەميولوگتەر ساباق جۇرگىزدى. قالاي زالالسىزداندىرۋ كەرەك، قالاي وتا جاساۋ كەرەك، قالاي كيىم كيۋ كەرەك دەگەن سياقتى ەپيدەميولوگيالىق ساباقتاردى قايتا پىسىقتادىق»، - دەدى ا. قاراعويشيەۆا.
التىناي ىستەيتىن اۋرۋحانا بولىمشەسىندە قازىر 5 دارىگەر جۇمىس ىستەيدى. 3 دارىگەر كۇندىز كەزەكشىلىكتە بولسا، 2 دارىگەر تۇنگى اۋىسىمعا شىعادى.
«ويتكەنى قورعانىس كوستيۋمىمەن 24 ساعات جۇمىس ىستەۋ مۇلدە مۇمكىن ەمەس. بارا سالىسىمەن قورعانىس كوستيۋمىن كيەمىز. ناۋقاستاردى ارالاپ شىعامىز. ءبىر دارىگەر تۇسكەن ناۋقاستاردى قابىلداۋمەن بولسا، ەكىنشىسى وتا جاساۋ، بوساندىرۋ جۇمىسىمەن اينالىسادى. كۇنىنە 2-3 وتا جاساۋعا تۋرا كەلەدى. اكۋشەرلىك ءبولىم بولعان سوڭ، جارتى ساعاتتان كەيىن نە بولارىن بىلمەيسىز. ءاردايىم دايىن بولۋ كەرەك. قازىر قورعانىس كوستيۋمىمەن، ماسكامەن ايەلدەردى بوساندىرىپ، وتا جاسايمىز. وتە ىڭعايسىز، تەرلەپ جۇرەمىز، ماسكادان ءىز قالادى. وتا كەزىندە كوزىلدىرىك تەرلەيدى. ۇيرەنۋگە تۋرا كەلەدى»، - دەدى دارىگەر.
ناۋرىزدان بەرى پەرزەنتحانا قىزمەتكەرلەرىنە اۋراحانادان ورىن بولىنگەن. التىناي دا ءوزىنىڭ ارىپتەستەرىمەن بىرگە 2 اي بويى اۋرۋحانادا قونىپ، جۇمىس ىستەگەن. التىناي قاراعويشيەۆا 2002-2009-جىلدار ارالىعىندا س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىندە ءبىلىم العان.
ەڭبەك جولىن قاراساي اۋدانىنىڭ ۇزىناعاش قالاسىنا «ديپلوممەن - اۋىلعا» باعدارلاماسى بويىنشا باستاعان. قازىر ول 2 ۇل، 1 قىز تاربيەلەپ وتىر. جولداسى ەرجان مامبەتوۆ - ۇلتتىق گۆارديانىڭ 55/71 اسكەري ءبولىمىنىڭ 7- روتا ستارشيناسى. پاندەميا العاش كەلگەن كەزدە بۇل وتباسى بالالارىن اۋىلعا جىبەرىپ، 2 اي بويى كوروناۆيرۋسپەن كۇرەستىڭ العى شەبىندە بولعان.
«جۇكتى ايەلدەردە كوبىنەسە ءوز يممۋنيتەتى بولادى. الايدا اۋىر حالدە پنيەۆمونيامەن تۇسكەن جۇكتىلەر دە جەتەرلىك. ويتكەنى ولاردىڭ بارلىق ورگاندارى قىسىلىپ تۇرادى. سوسىن دەرتتىڭ دامۋى وتە تەز. ولار دا كىشكەنتاي بالا سياقتى تۇسكە دەيىن جاقسى بولسا، تۇستەن كەيىن جاعدايى ناشارلاۋى مۇمكىن. ال نارەستەلەردىڭ كوپشىلىگى، 95 پايىزى COVID-19 تەرىس ناتيجەمەن دۇنيەگە كەلىپ جاتىر. مەديتسينا ماماندارى از بولعاندىقتان، وڭاي بولىپ جاتقان جوق. كەشە اينالدىرعان 2-3 دارىگەر 7 وتا جاساپ، 6 ايەلدى بوساندىردىق»، - دەدى ا. قاراعويشيەۆا.
كەيىپكەرىمىز ب ۇ ۇ سايتىندا ءوزى تۋرالى ماقالا شىققانىنان حابارسىز بولعان. اۋىسىمنان شىققان كەزدە عانا ءوزى تۋرالى ماقالانى كورگەن.
