لاتىنعا نەگىزدەلگەن قازاق ءالىپبيىن جەتىلدىرۋگە بۇكىل قوعام اتسالىسۋدا - ادىلبەك قابا

نۇر- سۇلتان. قازاقپارات - ءتىل ساياساتى كوميتەتىنىڭ ۇيىمداستىرۋىمەن قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانىنداعى ورفوگرافيالىق جۇمىس توبىنىڭ وتىرىسى ونلاين جۇيەدە ءوتتى، دەپ حابارلايدى قازاقپارات.

بۇل عىلىمي جيىن «قازاق ءتىلى ءالىپبيىن لاتىن گرافيكاسىنا 2025 -جىلعا دەيىنگى كەزەڭ- كەزەڭىمەن كوشىرۋ جونىندەگى ءىس- شارالار جوسپارى» اياسىندا ۇيىمداستىرىلدى. وتىرىسقا ق ر ءبىلىم جانە عىلىم مينيسترلىگى عىلىم كوميتەتىنىڭ ءتوراعاسى ج. د. قۇرمانعالييەۆا قاتىسىپ، جاڭا ءالىپبيدى ەنگىزۋ ماسەلەلەرى بويىنشا ءسوز سويلەدى. وتىرىس ق ر مادەنيەت جانە سپورت مينيسترلىگى ءتىل ساياساتى كوميتەتى ءتوراعاسىنىڭ مىندەتىن اتقارۋشى، ورفوگرافيالىق جۇمىس توبىنىڭ مۇشەسى ءا. ك. قابانىڭ توراعالىعىمەن ءوتتى. وتىرىسقا عالىمداردان تۇراتىن جۇمىس توبىنىڭ مۇشەلەرى قاتىستى. «مەملەكەت باسشىسى قاسىم- جومارت توقايەۆ لاتىن گرافيكاسىنا نەگىزدەلگەن جاڭا قازاق ءتىلى ءالىپبيىن جەتىلدىرۋدى تاپسىرعانى بەلگىلى. تاپسىرما بەرىلگەننەن بەرىدەگى ۋاقىت ىشىندە قۇرامىندا 70-تەن استام عالىم بار ۇلتتىق كوميسسيا جانىنداعى جۇمىس توبى ءالىپبيدى جەتىلدىرۋگە ارنالعان 8 وتىرىسىن وتكىزىپ، مەملەكەت باسشىسى ايتقان ولقىلىقتارعا جان- جاقتى عىلىمي تالقىلاۋ جاسادى. ءالىپبيدى جەتىلدىرۋگە بۇكىل قوعام اتسالىستى. وزدەرىنىڭ جوبالارىن ۇسىندى. وسى ۋاقىتقا دەيىن لاتىن گرافيكاسىنا نەگىزدەلگەن 40-تان استام جوبا عالىمدار تاراپىنان قاراستىرىلدى، عىلىمي نەگىزگە كەلەتىن ۇسىنىستار ەسكەرىلدى، ارتىقشىلىقتارى ءالىپبي جەتىلدىرۋدە نازارعا الىندى. جوبانى ۇسىنۋشىلاردىڭ ساپالىق قۇرامى ءارتۇرلى. فيلولوگ، جاراتىلىستانۋ، تەحنيكا عالىمدارى، جەكە ازاماتتار، كاسىپكەرلەر جانە تاعى باسقا ماماندىق يەلەرى بار»،- دەدى ادىلبەك قابا وتىرىس بارىسىندا. ونىڭ ايتۋىنشا ءتىل - قاراپايىم حالىقتىڭ قولدانۋىنا، تەحنيكانى مەڭگەرۋىنە، ءارتۇرلى قارجى- ەكونوميكالىق جۇمىستار جاساعانىندا دا قولايلى بولۋى كەرەك. سوندىقتان ءتىل كوميتەتى جەتىلدىرىلگەن ءالىپبي نۇسقاسىن ەلىمىزدىڭ بارلىق ايماقتارىنداعى فيلولوگ عالىمدار مەن ءتىل ماماندارى اراسىندا ەكى رەت رەسپۋبليكالىق اشىق تالقىلاۋدان وتكىزگەن. زيالى قاۋىممەن، جازۋشىلارمەن دە اشىق تالقىلاعان. «بۇدان بولەك، ءبىلىم جانە عىلىم مينيسترلىگى ارقىلى ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە، ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىندە، وزگە دە ورتا، ورتا ارناۋلى جانە جوعارى وقۋ ورىندارىندا، ياعني مۇعالىمدەر، ستۋدەنتتەر، وقۋشىلار اراسىندا ءالىپبي جوبالارى بويىنشا سىناما جۇمىستارىن جۇرگىزدى. IT مامانداردىڭ پىكىرلەرى تىڭدالدى، ءارىپتەردىڭ Unicode ستاندارتىنا ساي بولۋى، كومپيۋتەردە تانىلۋ، وقىلۋ جانە كونۆەرتورلاۋعا نازار اۋدارىلدى. عالىمداردان قۇرالعان جۇمىس توبى الىپبيدەگى ءاربىر ءارىپتىڭ جازىلۋىن، وقىلۋىن، ادىستەمەلىك تۇرعىدان قابىلدانۋىن، تەحنيكالىق مۇمكىندىگىن حالىقارالىق تاجىريبە مەن قازاق ءتىلىنىڭ زاڭدىلىعى نەگىزىندە قايتا زەردەلەدى. تالقىلاۋ ب ا ق- تا، الەۋمەتتىك جەلىدە كەڭىنەن جۇرگىزىلدى. عالىمداردىڭ ءالىپبيدى جەتىلدىرۋگە قاتىستى 700- دەن استام عىلىمي ماقالالارى جارىق كوردى جانە رەسپۋبليكا جۇرتشىلىعى تالقىلاۋعا بەلسەندى قاتىستى. عالىمدار ءالىپبي جوباسىن ماقۇلداعان سوڭ، ونىڭ ەملە ەرەجەلەرى مەن پەرنەتاقتاعا قاتىستى شەشىمدەرى حاتتاماعا ەنگىزىلىپ، ۇكىمەت جانىنداعى ۇلتتىق كوميسسيا قاراۋىنا ۇسىنىلادى» ، - دەدى ول.