قيىندىقتار بولدى، سوعان قاراماستان ناۋقاستارعا مەديتسينالىق كومەك كورسەتتىك - الەكسەي سوي
«حابار24» تەلەارناسىندا وتكەن دوڭگەلەك ۇستەل وتىرىسى بارىسىندا جۇرگىزۋشى راحىم وشاقبايەۆ ساراپشىلاردىڭ مالىمەتتەرىنە سۇيەنە وتىرىپ، قازاقستاندا وزگە ەلدەرمەن سالىستىرعاندا، كوروناۆيرۋس ىندەتىنەن قايتىس بولعاندار سانىنىڭ از ەكەنىن ايتتى.
«دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە قارايتىن بولساق، ۇلى بريتانيادا 1 ميلليون ادامعا شاققاندا كىسى ءولىمى 665 ادامنان، يسپانيادا 608 ادامنان، قازاقستاندا 31 ادامنان كەلەدى»، - دەدى جۇرگىزۋشى.
«بۇل جەردە جاعدايعا ىقپال ەتىپ وتىرعان بىرنەشە فاكتور بار. سولاردىڭ ءبىرى مەديتسينالىق كومەكتىڭ قولجەتىمدىلىگى. ارينە، ءبىزدىڭ جۇمىسىمىزدا، ستاتسيونارلاردىڭ ناۋقاستارعا تولىپ كەتۋى سياقتى ءبىرشاما قيىندىقتار بولدى. سوعان قاراماستان شەت مەملەكەتتەردە ادامدار اۋرۋحانا دالىزدەرى مەن ەدەندە جاتقاندا ءبىزدىڭ ازاماتتارىمىز قاجەتتى مەديتسينالىق كومەكتى الدى»، - دەپ جاۋاپ بەردى الەكسەي سوي.
ونىڭ سوزىنشە، ادامداردىڭ ىندەتتەن قايتىس بولۋ جاعدايلارى كوبىنە پنيەۆمونيامەن بايلانىستى بولىپ وتىر. باسقاداي كورسەتكىشتەر دۇرىس.
«بىزدە ءوسىم تاپ وسى پنيەۆمونيامەن بايلانىستى اۋرۋلار بويىنشا بولدى. ەكىنشى جاعىنان جول اپاتتارىنان بولاتىن ادام ءولىمى ازايدى. جالپى العاندا ءبىز ادامداردىڭ قايتىس بولۋ جاعدايلارى پنيەۆمونيامەن بايلانىستى بولعاندىعىن انىق بايقادىق»، - دەدى مينيستر.
«ءبىز العاش رەت جاريالاعان كارانتين دەر كەزىندە قولعا الىنعان شارا بولدى. سونىڭ ارقاسىندا ىندەتتىڭ گەومەتريالىق پروگرەسپەن ءورشۋىنىڭ الدىن الا الدىق. كارانتين ىندەتتىڭ تاراۋىنا ايتارلىقتاي كەدەرگى بولدى. ادامدار ۆيرۋس جۇقتىرىپ جاتقانىمەن ولارعا مەديتسينالىق كومەك كورسەتىلىپ، ىندەت تاراۋ كورسەتكىشى تومەندەدى»، - دەدى مينيستر.
ونىڭ سوزىنشە، قازاقستاندا كوروناۆيرۋستان ادامداردىڭ قايتىس بولۋ جاعدايلارى كرانتين توقتاپ، ىندەت كۇرت ءورشىپ، دەنساۋلىق ساقتاۋ سالاسى اۋرۋحانالاردا ورىن مەن جاساندى تىنىس الۋ اپپاراتتارىنىڭ جەتىسپەۋشىلىگى سياقتى قيىندىقتاردى باستان وتكەرىپ جاتقاندا بولدى. ال وعان دەيىن ەلدەگى مەديتسينالىق مەكەمەلەردىڭ بارلىعى وزدەرىنە جۇكتەلگەن مىندەتتى تالاپقا ساي اتقاردى. جەدەل جاردەم كورسەتىلىپ، جاساندى تىنىس الۋ اپپاراتتارى دا جەتكىلىكتى بولدى. ازاماتتار مەديتسينالىق كومەكتى الىپ، قاجەتتى شارالار اتقارىلدى»، - دەدى مينيستر.
