الەكسەي سوي قازاقستاندا كارانتين شاراسىن جەڭىلدەتۋ جۇمىستارى قالاي جۇزەگە اسىرىلاتىنىن ءتۇسىندىردى
بۇل تۋرالى ق ر دەنساۋلىق ساقتاۋ ءمينيسترى الەكسەي سوي ءمالىم ەتتى، دەپ حابارلايدى قازاقپارات.
«ءبىز قازىر كارانتيندى جەڭىلدەتۋ بويىنشا ارنايى جوسپار دايىنداپ جاتىرمىز. جۋىق ارادا قالىڭ كوپشىلىكتى وسى جوسپارمەن دە تانىستىرامىز. ءبىز حالىقارالىق تاجىريبەنى زەرتتەپ جاتىرمىز، كوپتەگەن ساراپشىلاردى تارتتىق. الەم ەلدەرى كارانتيننەن قالاي شىقتى جانە قانداي شارالار قولداندى. كارانتيننىڭ بىردەن الىنىپ تاستالمايتىنى تۇسىنىكتى عوي»، - دەدى الەكسەي سوي راحىم وشاقبايەۆ جۇرگىزگەن «حابار24» تەلەارناسىندا وتكەن دوڭگەلەك ۇستەل وتىرىسىندا.
ءمينيستردىڭ سوزىنشە، كارانتيندى جەڭىلدەتۋ شارالارى ساتىلاپ جۇزەگە اسىرىلادى.
بۇل رەتتە ءبىز سول ۋاقىتتاعى ەلدەگى ەپيدەميولوگيالىق جاعدايدى نازارعا الامىز. ءار ءوڭىردىڭ ەرەكشەلىكتەرىن ەسكەرەمىز.
«مۇمكىن دەنساۋلىق ساقتاۋ سالاسى بويىنشا، قانداي دا ءبىر وكتەمدىك جۇرگىزىپ، دەمالىس كۇندەرى لوكداۋن جاريالارمىز. ارا قاشىقتىقتى ساقتاپ، جۇمىس ورنىندا شەكتەۋ شارالارىنىڭ كوپتەگەن ءتاسىلى بار. جالپى قازىرگى تاڭدا الەمدە ۆيرۋستى تەجەۋدىڭ سان ءتۇرلى تاسىلدەرى سىناقتان ءوتىپ جاتىر»، - دەپ قوستى دەنساۋلىق ساقتاۋ ۆەدومستۆوسىنىڭ باسشىسى.
سونىمەن بىرگە مينيسترگە بالاباقشالار مەن ءبىلىم بەرۋ ورىندارى اشىلادى ما؟ دەگەن ساۋال دا قويىلدى.
«ول ءۇشىن بىزگە 2- تامىزدا جاعدايدىڭ قانداي بولاتىنىن ءبىلۋ كەرەك. ەگەر ول ۋاقىتتا جاعداي تۇراقتانىپ، كورسەتكىشتەر قازىرگىدەي جاقسارا بەرەتىن بولسا، ءبىز بالاباقشالار مەن ءبىلىم بەرۋ مەكەمەلەرىن اشۋ ماسەلەسىن پىسىقتايتىن بولامىز. ال كەرىسىنشە، ۆيرۋس قايتا ءورشىپ، بولماسا اۋرۋ مەن ودان قايتىس بولعاندار سانى وسەتىن بولسا، ارينە، ءبىز ۇكىمەتكە كارانتيندى سوزا ءتۇسۋدى ۇسىنامىز»، - دەدى دەنساۋلىق ساقتاۋ ءمينيسترى.
سونداي-اق ول سوزىندە قازىرگى تاڭدا ەلىمىزدەگى ەپيدەميولوگيالىق جاعدايدىڭ تۇراقتانىپ كەلە جاتقانىن ايتتى.
«قازىر جاعداي تۇراقتانىپ كەلەدى. ءبىز ەكى اپتاعا سوزىلاتىن كارانتين شاراسىنىڭ ناتيجەسىن تەك ءۇشىنشى، ءتورتىنشى اپتالاردا عانا بىلە الامىز. ويتكەنى ينكۋباتسيالىق كەزەڭ 14 كۇن. وسى 14 كۇن وتكەننەن كەيىن عانا ءبىز كارانتيننىڭ ناتيجەلەرىن كورە الامىز. تامىزدىڭ ورتاسىنا تامان جاعداي ايقىندالا تۇسەدى سول كەزدە عانا بىزگە ودان ءارى جاسايتىن ارەكەتىمىزدىڭ جوسپارىن جاساۋعا بولادى»، - دەگەن پىكىرىن ءبىلدىردى مينيستر.
