اقتوبەگە رەسەي مەن وزبەكستاننان گۋمانيتارلىق كومەك جەتتى

اقتوبە. قازاقپارات - بۇگىن اقتوبە وبلىسىنا وزبەكستاننان گۋمانيتارلىق كومەك كەلدى.

تاۋاردى «COVID 19» مونيتورينگ توبى قابىلداپ الدى، دەپ حابارلايدى قازاقپارات ءتىلشىسى.

«COVID 19» مونيتورينگ توبى ەلىمىزدەگى اقپارات جانە قوعامدىق دامۋ ءمينيسترى جانە دەنساۋلىق ساقتاۋ ءمينيسترى اراسىنداعى مەموراندۋم اياسىندا قۇرىلعان بولاتىن.

بەلسەندىلەر گۋمانيتارلىق كومەكتى اۋرۋحانا، ءدارىحانا، دارىگەرلەرگە ءبولىپ، ءدارىحاناداعى باعانى باقىلاۋعا قاتىسادى.

وزبەكستاننان جەتكىزىلگەن گۋمانيتارلىق كومەك اراسىندا 500 مىڭ قولعاپ پەن 480 مىڭ دانا ماسكا بار. ونى «انتيكور ورتالىعىنىڭ» وكىلدەرى، ەرىكتىلەر كۇتىپ الدى.

الدىمەن سالاۋاتتى ءومىر سالتىن قالىپتاستىرۋ ورتالىعىنا اكەلىنىپ، ودان سوڭ اۋرۋحانالارعا تاراتىلادى.

«اقتوبەگە رەسەيدەن دە گۋمانيتارلىق كومەك كەلدى. وندا 90 مىڭ قورعانىش كوستيۋمى، 10 مىڭ ماسكا، 920 دانا ۆيرۋسقا قارسى «كوروناۆير» پرەپاراتى بار. جۇك «شاعالا» شيپاجايىنداعى پروۆيزورلىق ورتالىققا جەتكىزىلدى. ودان ءارى وزگە اۋرۋحانالار مەن اۋداندارعا تاراتىلادى. ەرىكتىلەر ءار ءدارىنىڭ دىتتەگەن جەرىنە جەتۋىن قامتاماسىز ەتەدى»، - دەپ حابارلادى «COVID 19 قوعامدىق باقىلاۋ» توبىنىڭ مۇشەسى رافيك تازتدينوۆ.