جانداربەك بەكشين تۇماۋدىڭ دا قاۋىپتى ەكەنىن ەسكەرتتى
«جرۆي مەن تۇماۋعا كوروناۆيرۋس ينفەكتسياسى قوسىلسا جاعداي وتە قيىن بولادى. ءبىز جەدەل زەرتحانالىق كەشەندى تالداۋ جاساۋ سۇراقتارىن قاراستىرىپ جاتىرمىز. قازىر جاڭا تەحنولوگيالار پايدا بولدى. ولاردى دەر كەزىندە ەنگىزۋ ءۇشىن ۋاقىتىمىز بار. جرۆي مەن تۇماۋمەن اۋىرعاندار سانىن ازايتۋ ءۇشىن، تۇماۋعا قارسى ۆاكتسيناتسيا جاساۋ كەرەك»، - دەدى بەكشين.
ول كوروناۆيرۋس ينفەكتسياسى ءتارىزدى جەدەل رەسپيراتورلىق جانە ۆيرۋستىق ينفەكتسيا كەزىندە دە ادامداردىڭ كوز جۇمۋ جاعدايلارىنىڭ بولاتىندىعىن ەسكەرتتى.
«سول سەبەپتى بىزگە جۇيەلى جۇمىس جۇرگىزۋ كەرەك. ءبىز بۇل ماسەلەلەردى تالقىلاپ، كوروناۆيرۋسپەن قاتار، جرۆي مەن تۇماۋدىڭ الدىن الۋ شارالارىن قاراستىرىپ جاتىرمىز. ءبىرىنشى بولىكتى جويۋ ءۇشىن ۆاكتسيناتسيا جاساۋ كەرەك. ەگەر ءبىرىنشى ادام تۇماۋمەن اۋىرىپ، وعان كەيىن كوروناۆيرۋس قوسىلسا يممۋنيتەت كوتەرە المايدى. سول سەبەپتى ءبىز جاقسى ۆاكتسيناتسيا جاساۋعا دايىندالۋىمىز كەرەك. ەگەر كوروناۆيرۋس ينفەكتسياسى تۇماۋدىڭ ۇستىنە قوسىلسا كەز كەلگەن اعزانىڭ ەكى سوققىعا شىداۋى قيىن بولادى»، - دەپ ءتۇسىندىردى جانداربەك بەكشين.
