ماعزۇم مىرزاعاليەۆ كولساي، ەسىك كولدەرىنىڭ پروبلەمالارى تۋرالى ايتتى

نۇر- سۇلتان. قازاقپارات - ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ الماتى وبلىسىنداعى ەسىك كولىنىڭ تارتىلۋ سەبەپتەرىن اتادى، دەپ حابارلايدى قازاقپارات ءتىلشىسى.

و ك ق- دا وتكەن ونلاين باسپا ءسوز ءماسليحاتى بارىسىندا مينيسترگە كول جاعاسىنداعى قوناق ۇيلەرگە قاتىستى سۇراق قويىلدى. ماعزۇم مىرزاعاليەۆتىڭ ايتۋىنشا دۇرىس جۇرگىزىلمەيتىن قۇرىلىس جۇمىستارىمەن زاڭناماعا ساي كۇرەس جۇرگىزۋ كەرەك.

«سول سەبەپتى كولساي كولى بويىنشا مەن جەكە اينالىسامىن. ول تۋرالى ءالى جەكە ايتا جاتارمىز. ەسىك كولىنە كەلەر بولساق، ول جەردە قۇرىلىسقا قاتىستى پروبلەما بولماعان. ماسەلە گيدروەلەكتروستانتسياعا بايلانىستى بولدى. ول جەردەن كەيدە سۋ جىبەرىلىپ تۇراتىن. بيىل كولدە سۋ از قالدى دا، سول اۋدانداردا سۋ جەتىسپەۋشىلىگى سەزىلە باستادى. ءبىز ول ماسەلەگە قاتىستى ارنايى حات جولداپ، الماتى وبلىسىنىڭ اكىمدىگىمەن سويلەستىك. بۇل جاعدايدىڭ جاعىمسىز سالدارىن بارىنشا ازايتقىمىز كەلەدى»، - دەدى ول.