تۇركىستان مەكتەپتەرىندە ىستىق تاماقتان ۇنەمدەلگەن قارجىعا كوپبالالى وتباسىلارعا نوۋتبۋك اپەرىلەدى

تۇركىستان. قازاقپارات - تۇركىستان قالاسىنىڭ اكىمى راشيد ايۋپوۆ مەكتەپ ديرەكتورلارىمەن قاشىقتان ساپالى وقىتۋ ماسەلەسى بويىنشا دايىندىقتارىن پىسىقتادى.

ونلاين بايلانىس كەزىندە ءار ءپاندى ۇيدە وتىرىپ وقۋدا ەڭ ءتيىمدى جانە جاڭاشىل جولداردى قاراستىرۋدىڭ ماڭىزدىلىعى تالقىلاندى، دەپ حابارلايدى قازاقپارات ءتىلشىسى.

تالقىلاۋ بارىسىندا جەرگىلىكتى «تۇران- تۇركىستان» تەلەارناسى ارقىلى مۇعالىمدەردىڭ كۇندەلىكتى ساباق بەرۋى مەن OnlineMektep قاشىقتىقتان وقىتۋ جۇيەسىن ورتا ءبىلىم بەرۋ ۇيىمدارىنا ەنگىزۋ، Youtube كانالىنا وزىق تاجىريبەلى مۇعالىمدەردىڭ ساباقتارىن جۇكتەۋ مەن وقۋشىلاردى تەحنيكالىق قۇرالمەن قامتاماسىز ەتۋ جاعى پىسىقتالىپ جاتقانى ايتىلدى. سونداي-اق، ZOOM، Google Classroom, EduPage ارقىلى جۇمىس جاساۋ جولىندا دايىندىق بارىسى ءسوز بولدى.

سالا ماماندارىنىڭ ايتۋىنشا، مەكتەپتەردە كارانتين كەزىندە قاراستىرىلعان ىستىق تاماق پەن كيىم- كەشەكتەن ۇنەمدەلگەن قارجىعا كوپبالالى وتباسىلارعا پلانشەت پەن نوۋتبۋك اپەرىلمەك.

«بيىل 1-11-سىنىپقا 44000 نان استام وقۋشى كەلەر بولسا، ونىڭ 22000 عا جۋىعى، ياعني 9000 نان استام وتباسىن تەحنيكامەن قامتاماسىز ەتۋ جوسپارلانعان. بيىل جاڭا پلاتفورماعا گەيميفيكاتسيا، ياعني، وقىتۋ پروتسەسىن ويىن تەحنيكاسى ارقىلى ىسكە اسىرۋ قاراستىرىلۋدا. وقۋشى ءار وتكەن ساباقتارى ءۇشىن بونۋس جيناپ، ناتيجەسىندە ءتۇرلى سىيلىقتارعا يە بولا الادى»، - دەيدى سالا ماماندارى.

ودان وزگە، «جۇمىسپەن قامتۋ جول كارتاسى» باعدارلاماسى بويىنشا اعىمداعى جوندەۋ جۇرگىزىلىپ جاتقان 26 مەكتەپ مەن ءبىر بالاباقشانىڭ قۇرىلىس بارىسى دا جەرگىلىكتى بيلىكتىڭ باستى نازارىندا. بۇگىندە ق. ساتبايەۆ، №21، №24 جانە س. راقىمموۆ مەكتەپتەرىندە جوندەۋ جۇمىستارى تولىق اياقتالسا، 6 مەكەمەدە باياۋ ءجۇرىپ جاتىر. ءوز كەزەگىندە قالا باسشىسى، جوندەۋدە اسىرەسە ىشكى اجەتحانا جۇيەسى مەن مەكتەپ اۋلاسىن قورشاۋعا باستى نازار قويۋ قاجەتتىگىن ايتتى.

ايتا كەتەيىك، قالاداعى 33 مەكتەپتىڭ ىشىندە 28 ىندە عانا ىشكى اجەتحاناسى بار. باسقا مەكتەپتەردە اجەتحانا قوسىمشا سالىنىپ نەمەسە مودۋلدى اجەتحانامەن قامتاماسىز ەتىلەدى دەپ جوسپارلانىپ وتىر.

اۆتور: اينۇر اقبايەۆا