سيرەك كەزدەسەتىن تۇڭعيىق گۇلدى جۇلعان الماتىلىقتار جازالانۋى مۇمكىن

الماتى. قازاقپارات - الماتىدا پەرۆوماي توعانىندا تۇڭعيىق گۇلدەردى جۇلعان الماتىلىقتار جازاعا تارتىلۋى مۇمكىن، دەپ حابارلايدى قازاقپارات ءتىلشىسى.

بۇل زاڭ بۇزۋشىلىق جايلى قالا تۇرعىنى يۋليا نيزاموۆا Instagram پاراقشاسىندا جاريالادى.

«ينستاگرامدا ءبىر قىز توعاندا سۋ كەشىپ، تۇڭعيىق گۇلدى جۇلعانىن سالىپ قويىپتى. بۇل گۇلدەر وسى جەردە عانا وسەتىنىن بىلمەسە كەرەك. بۇل ارەكەت مەنىڭ اقىلىما قونبايدى. جۇلىنعان گۇلدەر ۇيگە دە جەتپەيدى»، - دەدى يۋليا نيزاموۆا.

الەۋمەتتىك جەلىدە ادامدار تۇڭعيىق گۇلمەن تۇسكەن سۋرەتتەرىن كوپتەپ جاريالاي باستادى.

پەرۆوماي توعانى الماتى ىرگەسىندە الماتى وبلىسىنىڭ اۋماعىندا ورنالاسقان. بۇل توعانعا كىرۋ اقىلى ەكەن. پەرۆوماي دەمالىس ساياباعىنىڭ وكىلدەرى ادام باسىنا 1000 تەڭگە الادى.

الماتى پوليتسياسىنىڭ باسپا ءسوز قىزمەتىنەن حابارلاعانداي، تۇڭعيىق گۇلدى جۇلدى دەگەن شاعىممەن ەشكىم پوليتسياعا حابارلاسپاعان. مامانداردىڭ ايتۋىنشا، مۇنداي قۇقىقبۇزۋشىلىقتار ءۇشىن ق ر ا ق ب ك 386-بابىمەن (جاسىل جەلەكتى ۇستاۋ، كۇتىپ باعۋدا جىبەرىلگەن زاڭبۇزۋشىلىق) ايىپپۇل قاراستىرىلعان.

تۇڭعيىق گۇل قازاقستان رەسپۋبليكاسىنىڭ قىزىل كىتابىنا ەنگىزىلسە، ونى جۇلعان ادام قىلمىستىق جاۋاپكەرشىلىككە دە تارتىلۋى مۇمكىن.

جالپى قىزىل كىتاپقا 373 ءتۇرلى وسىمدىك، 13 ءتۇرلى ساڭىراۋقۇلاق ەنگەن. بۇل وسىمدىكتىڭ تامىرى تەرەڭ سۋ استىنا بويلاپ كەتەدى. تۇڭعيىقتىڭ 3 ءتۇرلى جاپىراعى بار. ءبىرى سۋ ۇستىندە بولسا، ءبىرى - ورتاسىندا ءۇشىنشىسى سۋ استىندا وسە بەرەدى.