دەنساۋلىق ساقتاۋ ءمينيسترى قازاقستاندىقتارعا ۇندەۋ جاسادى
«ەلىمىزدە شەكتەۋ شارالارى الىنىپ تاستالعان كەزدە كوروناۆيرۋس ينفەكتسياسى ەشقايدا جوعالىپ كەتپەگەنىن ەستەن شىعارماۋ كەرەك. ءبىز وعان ۇيرەنىپ، كۇرەسىپ، ءومىر ءسۇرۋىمىز كەرەك. ءومىر جالعاسادى. ءار ادام اۋا رايىنا بەيىمدەلەدى. جاڭبىر جاۋسا، ءبىز قولشاتىر الىپ، ءوزىمىزدى سۋدان قورعايمىز. كۇن سۋىسا جىلى كيىم كيەمىز. مۇندايدا ءتىپتى ويلانبايمىز، ءبارى قالىپتى جاعداي»، - دەدى مينيستر و ك ق- دا وتكەن باسپا ءسوز ءماسليحاتىندا.
الەكسەي سوي قانداي شارا بولماسىن ءبارى قاشىقتان ءوتۋى كەرەكتىگىن ەسكەرتتى.
«ەگەر ينفەكتسيا بولسا، قانداي دا ءبىر ەپيدەميولوگيالىق كەزەڭ باستالسا نەمەسە اۋا تامشىمەن ينفەكتسيا تاراسا، ماسكا كيۋ، جاقىندارىڭىزدى قورعاۋ، الەۋمەتتىك قاشىقتىقتى ساقتاۋ، دوستارىمىزدى، ارىپتەستەرىمىزدى قورعاۋ - قالىپتى جاعدايعا اينالۋى كەرەك. ەگەر قانداي دا ءبىر شارا بولسا، ادامدار ءبىر- بىرىنەن الشاقتاپ، الىستاپ وتىرۋى كەرەك. قازىر ينفەكتسيا قاتتى ءورشىپ كەتەدى دەپ كۇتپەسەك تە، بۇل ءبىزدىڭ قالىپتى ومىرىمىزگە اينالۋى ءتيىس»، - دەدى دەنساۋلىق ساقتاۋ ءمينيسترى.
مينيستر حالىققا ۇندەۋ جاساپ، دەنساۋلىق ساقتاۋ سالاسىنا ءبارىمىز كومەكتەسۋىمىز كەرەكتىگىن ايتىپ ءوتتى.
«بۇل مەملەكەتكە عانا ەمەس، وزىمىزگە دە، بالالارىمىزعا، جاقىن ادامدارىمىزعا دا ەڭ ۇلكەن كومەك بولادى. بۇل جەكە باس گيگيەناسىن ساقتاۋ، قاشىقتىقتى ساقتاۋ، قولدى جۋىپ تۇرۋ، سالاۋاتتى ءومىر سالتىن ساقتاۋ، يممۋنيتەتتى كوتەرىپ، سپورتپەن اينالىسۋ كەرەك. ەگەر ءوزىمىزدى وسىلاي ۇستاساق، مەنىڭ ويىمشا، ءبىز وسى ينفەكتسيانى جەڭىپ، بۇل ىندەتتى جەڭەمىز»، - دەپ تولىقتىردى الەكسەي سوي.
