شىعىس قازاقستاندا ۇرى ءۇي توناپ جاتقاندا ۇيىقتاپ قالعان
پوليتسيانىڭ مالىمەتىنشە، 54 جاستاعى كۇدىكتى ازامات ءوز كىناسىن مويىنداعان. ول 19-ماۋسىم تۇنىندە الكوگولدى ماس كۇيىندە يەسى جوق ەكەنىن الدىن الا ءبىلىپ، جەكەمەنشىك ۇيگە كىرىپ كەتكەن.
«پوليەتيلەن پاكەتكە 8 مىڭ تەڭگەگە ازىق-تۇلىك جيناپ العان ول قىلمىس جاساۋ كەزىندە ۇيىقتاپ كەتكەن. تاڭەرتەڭ ۇيدەن ۇرلاعان زاتتارىمەن شىققان بويدا ۇستالىپ، جارما اۋدانىنىڭ پوليتسيا بولىمىنە جەتكىزىلدى. ەر ادامنىڭ بۇرىن وسىعان ۇقساس قىلمىس جاساعانى ءۇشىن قىلمىستىق جاۋاپكەرشىلىككە تارتىلعانى انىقتالدى» دەپ ءتۇسىندىردى پوليتسيادان.
ش ق و پوليتسيا دەپارتامەنتىنىڭ باستىعى ساعات ماديەۆ اتالعان فاكتى سوت الدىنداعى تەرگەۋدىڭ ءبىرىڭعاي تىزىلىمىنە ق ر ق ك 188-بابىنىڭ 3- ءبولىمى، 3-تارماعىندا قاراستىرىلعان قىلمىس بەلگىلەرى بويىنشا تىركەلگەنىن حابارلادى. تەرگەۋ امالدارى جۇرگىزىلىپ جاتىر.
