اسحات ايماعامبەتوۆ: كەلەسى وقۋ جىلىنان بالالار «الىپپە» مەن «انا ءتىلىن» وقيدى

نۇر-سۇلتان. قازاقپارات - كەلەسى وقۋ جىلىندا ءبىرىنشى سىنىپ وقۋشىلارى «ساۋات اشۋ» ءپانىنىڭ ورنىنا «الىپپە» مەن «انا ءتىلىن» وقيدى.

ق ر ءبىلىم جانە عىلىم ءمينيسترى اسحات ايماعامبەتوۆ Facebook-تەگى پاراقشاسىندا وسىلاي جازدى، دەپ حابارلايدى قازاقپارات.

«الىپپە بويىنشا. جاقىندا مەملەكەتتىك جالپىعا مىندەتتى ستاندارتقا وزگەرىستەر ەنگىزىلىپ، ادىلەت مينيسترلىگىندە تىركەۋدەن ءوتتى. ونداعى ماڭىزدى جاڭالىقتاردىڭ ءبىرى - كەلەسى وقۋ جىلىندا ءبىرىنشى سىنىپ وقۋشىلارى «ساۋات اشۋ» ءپانىنىڭ ورنىنا «الىپپە» مەن «انا ءتىلىن» وقيتىن بولادى. ءبىرىنشى سىنىپ وقۋشىلارى وقۋ جىلىنىڭ باستاپقى ەكى توقسانىندا «الىپپەنىڭ» باعدارلاماسىن وقىسا، قالعان ەكى توقساندا «انا ءتىلى» ءپانىن وقيدى. سايكەسىنشە، ورىس تىلىندە نەمەسە باسقا تىلدەردە ءبىلىم الاتىن سىنىپتاردا «بۋكۆار» مەن «وبۋچەنيە گراموتە» پاندەرى جۇرگىزىلەدى»، - دەدى اسحات ايماعامبەتوۆ.

ونىڭ ايتۋىنشا، «الىپپە» احمەت بايتۇرسىن ۇلىنىڭ ادىستەمەسى نەگىزىندە دايىندالادى. مينيستر ءقازىر وقۋلىقتاردى ازىرلەۋ بويىنشا ۇلكەن جۇمىس جۇرگىزىلىپ جاتقانىن اتاپ ءوتتى.

«ءبىرىڭعاي باعدارلاما جاساۋمەن اينالىساتىن جۇمىس توبىن قۇردىق. ونىڭ قۇرامىندا مىقتى ءتىل ماماندارى، ادىسكەرلەر، باستاۋىش سىنىپ مۇعالىمدەرى مەن بۇعان دەيىن وقىتىلعان «الىپپە» وقۋلىقتارىنىڭ اۆتورلارى بار. ورىنباسارىم شولپان كارينوۆا وسى جۇمىس توبىنىڭ العاشقى وتىرىسىن وتكىزىپ تە ۇلگەردى. باعدارلامالار مەن وقۋلىقتار دايىن بولعاننان كەيىن ولاردى پيلوتتىق مەكتەپتەردە سىناقتان وتكىزەمىز دەپ جوسپارلاپ وتىرمىز. كەيىن باسقا مەكتەپتەرگە جىبەرىلەتىن بولادى. بۇل ماسەلە مەنىڭ ءجىتى باقىلاۋىمدا»، - دەدى اسحات ايماعامبەتوۆ.