كۇن سايىن قانشاما وتباسى قارا جامىلىپ وتىرعاندا ەفيردەن توك-شوۋ كورسەتۋ دۇرىس پا
ۇندەۋدى باس رەداكتورلار كلۋبىنىڭ جەتەكشىسى بيبىگۇل جەكسەنباي Facebook پاراقشاسىندا جاريالادى.
«ەلىمىزدەگى بارلىق بۇقارالىق اقپارات قۇرالدارىنا، تەلەارنالار مەن ينتەرنەت باسىلىمدارعا، الەۋمەتتىك جەلىدەگى جەكەمەنشىك سايت يەلەرى مەن بلوگەرلەرگە ۇندەۋ جولدايمىز. بۇگىنگى تاڭدا بۇكىل الەم ەمى تابىلماي وتىرعان قاۋىپتى ىندەتتىڭ تارالۋىنان شەتى مەن شەگى كورىنبەيتىن، تاۋداي تولقىندارى دولدانا تۋلاعان تەڭىزدە ءتورت قۇبىلاسىنان تىنىشتىق تاپتاي تەڭسەلگەن كەمەدەي كۇردەلى كەزەڭدى باستان كەشىپ وتىر. قارا تۇنەك قىسپاقتان قۇتىلۋدىڭ جالعىز جولى - سونبەگەن ۇمىتتەي بولىپ الىستان جىلتىراپ، باستى باعىتقا جول سىلتەيتىن شامشىراقتىڭ جانىپ- وشكەن ءالسىز جارىعى. ءبىزدىڭ قوعام دا كەمە سەكىلدى. ال ەندى قوعامدى قيىندىقتان الىپ شىعار شامشىراق - ول اقپارات قۇرالدارى. ⅩⅩعاسىردىڭ باسىنداعى ۇلت ۇستازى احمەت بايتۇرسىنوۆتىڭ «گازەت - حالىقتىڭ كوزى، قۇلاعى ءھام ءتىلى» دەۋى دە تەگىن ەمەس ەدى. ءدال وسى اكسيومانىڭ بۇگىنگى اقپارات داۋىرىندە قۇنى ارتپاسا، كەمىمەسى انىق. ويتكەنى، قيىندىققا تاپ بولعان قوعامنىڭ دەرتىنەن ارىلىپ، دەنەسىن تىكتەپ، باعدارىن ايقىنداۋ ءۇشىن شىنايى اقپاراتتىڭ اۋاداي قاجەت ەكەنىن تارلان تاريح تالاي دالەلدەگەن. ال جالعان اقپاراتتىڭ قاتەرى ىندەتتەن جامان ەكەنى دە شىندىق» دەلىنگەن ۇندەۋدە.
سوندىقتان باس رەداكتورلار كلۋبى كۇن سايىن قانشاما وتباسى قيماسىنان ايىرىلىپ، قارا جامىلىپ وتىرعاندا ەفيرلەردەن توي تويلاعانداي تايراڭداعان، بي بيلەگەندەي سەكەڭدەگەن توك-شوۋلاردى كورسەتۋ باسقاسىن بىلاي قويعاندا، ادامگەرشىلىك قاعيدالارىمەن قابىسپايتىنىن ايتادى.
«ونىڭ ورنىنا تاقىرىپتىق، تانىمدىق دۇنيەلەردى حالىققا ۇسىنساق دۇرىس بولار ەدى دەپ ويلايمىز. قاي زاماندا بولسىن اقپارات قۇرالدارى مەملەكەتتىك يدەولوگيانىڭ باستى سالاسى بولىپ سانالادى. سوندىقتان، بۇكىل ەل كوز تىگىپ وتىرعان ەفيرىمىزدەن حالىقتىڭ كوڭىلىندەگىنى ءدوپ باساتىن، ەلدىڭ جوعىن جوقتايتىن، ۇلتتىق داستۇرلەرىمىز بەن بۇكىل ادامزاتتىق قۇندىلىقتاردى ناسيحاتتايتىن حابارلار مەن دۇنيەلەر كورسەتىلسە دەگەن تىلەگىمىز بار» دەلىنگەن باس رەداكتورلار كلۋبىنىڭ ۇندەۋىندە.
