الماتىنىڭ زيالى قاۋىم وكىلدەرى قالا تۇرعىندارىنا ۇندەۋ جاسادى - ۆيدەو
ولاردىڭ اراسىندا قازاق جازۋشىسى جانە كينودراماتۋرگ، قازاقستان جازۋشىلار وداعىنىڭ مۇشەسى، قازاقستاننىڭ ەڭبەك سىڭىرگەن قايراتكەرى سماعۇل ەلۋباي، اكتەر، تەاتر جانە كينو رەجيسسەرى ءاسانالى ءاشىموۆ، اقىن، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت بار، دەپ حابارلايدى قازاقپارات.
«بۇرىن- سوڭدى بولماعان وسىنداي ناۋبەت كەزىندە بىرىگەيىك. بىرلەسىپ جۇمىس ىستەيىك، ءبىر- ءبىرىمىزدى تىڭدايىق. جوعارىدان بەرىلىپ جاتقان مالىمەتتەردى ورىندايىق. قارت بۋىنعا مەن سەنەم، ولاردىڭ تارتىبىنە سەنەمىن. مەن مىناۋ جاستارعا كوڭىل اۋدارىپ وتىرمىن. قالاي بولسا سولاي ءجۇرىپ، ماسكاسىز ءجۇرىپ، توي- جيىن جاساۋدى دوعارۋ كەرەك ۋاقىتشا. تويلايتىن ۋاقىت الدا»، - دەگەن اسانالى ءاشىموۆ ەل وسىناۋ كۇردەلى جاعدايدان شىققاندا قۋانىشتى ساتتەردى اتاپ وتەتىن كەزدەر كوپ بولاتىنىن اتاپ ءوتتى.
«بارلىعى ادامنىڭ اقىلىنا بايلانىستى. مەملەكەتىمىزدىڭ بايلىعى - حالىق. حالىق بايلىعى - ەل بايلىعى. سوندىقتان ءارقايسىمىز ءبىر- بىرىمىزگە ادال بولايىق، ءار ۋاقىتتا ءبىر- بىرىمىزگە قورعانىش بولايىق. ساقتايىق ءبىر- ءبىرىمىزدى، ول ءۇشىن ءتارتىپ كەرەك. وسىنى قولعا الايىق»، - دەپ ۇندەۋ تاستادى اسانالى ءاشىموۆ.
ءوز كەزەگىندە اقىن، جۋرناليست جانە رەداكتور ۇلىقبەك ەسداۋلەت تە قالا تۇرعىندارىنان ەپيدەميولوگيالىق تالاپتاردى ساقتاپ، ءوز دەنساۋلىقتارىنا بەي-جاي قاراماۋعا شاقىردى.
«الەمدى تىتىرەنتكەن كوروناۆيرۋس ىندەتى ءبىزدىڭ حالقىمىزعا دا قىرعيداي ءتيىپ، شەتىنەن باۋداي ءتۇسىرىپ جاتىر. كۇندە ەستيتىنىڭ قارالى حابار، ازالى سوزدەر. حالقىمىزدىڭ نەبىر اتپال، ابزال ازاماتتارى، قايراتكەر تۇلعالارى، دارىندى، تالانتتى ادامدارى بەيمەزگىل دۇنيەدەن ءوتىپ جاتىر. قارالى شاڭىراقتار، ازالى وتباسىلار كۇننەن كۇنگە كوبەيىپ بارا جاتىر. سوندىقتان ءبىز ساقتىق شارالارىن قايتادان كۇشەيتۋىمىز كەرەك، ءبىز ەندى بۇلاي قاراپ وتىرا بەرىپ، شىبىنشا قىرىلا بەرۋگە بولمايدى. مەديتسينانى مەملەكەت قولىنا الىپ، ءبارىن تىرتىپكە كەلتىرىپ جاتقان كەزدە ءدارى- دارىمەكتى، گۋمانيتارلىق كومەكتەردى، جەدەل جاردەمدى، اۋرۋحانالاردى جوندەپ جاتقان كەزدە ءبىز دە ءوزىمىز ساقتىق شارالارىن ساقتاپ، مەديتسينالىق نورمالاردى ساقتاپ، ىندەتتى جەڭۋگە ءبىر كىسىدەي ات سالىسايىق»، - دەدى ۇلىقبەك ەسداۋلەت.
سونىمەن بىرگە، ول كوپ ادامداردىڭ جينالۋىمەن توي، سالتاناتتى شارالار مەن باسقا جيىنداردىڭ ءالى دە وتكىزىلەتىنىن ايتىپ، ەل ازاماتتارىنان وسىنداي شارالاردى ۋاقىتشا وتكىزبەي تۇرۋعا شاقىردى.
«باياعىدا شاقىرعان جەردەن قالما دەۋشى ەدى، قازىرگى كەزدە شاقىرعان جەرگە بارما دەيتۇعىن ماتەل پايدا بولدى. سوندا دا قويماستان ءبىزدىڭ ارامىزدا، اۋىلدارىمىزدا، قالالارىمىزدا تىعىلىپ توي جاساۋ، تىعىلىپ سۇندەت توي، باسقا دا قىز ۇزاتۋ، كەلىن ءتۇسىرۋ، تۋعان كۇن دەگەن دۇنيلەردى، ءتىپتى ءبىر تۇنگى كلۋبتارعا جينالىپ الىپ، بولماسا، تاۋعا بارىپ تىعىلىپ توي- تومالاق وتكىزۋ ادەتى ءالى دە تىيىلماي تۇر. سونىڭ ءبارىن پىشاق كەستى توقتاتۋ كەرەك، ايتپەسە ءبىز وسىنداي تارتىپسىزدىك ارەكەتتەرىمىزبەن، نورمالاردى ساقتاماۋ ارەكەتتەرىمىزبەن كوروناۆيرۋس سياقتى دۇشپانعا كومەكتەسكەن بولىپ شىعامىز. سوندىقتان مىڭ جەردەن قازاقتىڭ تويعا بارماسا ۇيات، توي بولماسا ۇيات، قوناق شاقىرماسا ۇيات، قوناققا بارماسا ۇيات دەيتىن ادەتتەرىنە قازاقتىڭ ۇياتى كىنالى بولسىن دەگەن ويمەن جازىپ، تاراتىپ جاتقاندار بار. مەنىڭشە بۇل دۇرىس ەمەس. قازاقتىڭ ۇياتىنا تيىسپەۋ كەرەك. قازاقتىڭ ار- ۇياتى ءارقاشاندا بيىكتە. مۇنىڭ سەبەبىن ىزدەيتىن بولساق، ۇياتتان ەمەس، ۇياتسىزدىقتان، تارتىپتەن ەمەس، تارتىپسىزدىكتەن ىزدەۋىمىز كەرەك. سوندىقتان قاشان دا ساقتىق شارالارىن ابايلاپ، مەديتسينالىق نورمالاردى قولدانىپ، بارلىعىنا دا اباي بولايىق. ۇمىتپەن ءومىر سۇرەيىك، سەنىممەن كۇن كەشەيىك! امان- ساۋ جۇزدەسەيىك دەگىم كەلەدى»، - دەدى ۇلىقبەك ەسداۋلەت.
جازۋشى سماعۇل ەلۋباي وزىڭە عانا ەمەس، اينالاداعى ادامداردىڭ دا دەنساۋلىعىنا بەي-جاي قاراماۋ كەرەك ەكەنىن اتاپ ءوتتى.
«قۇرمەتتى الماتىلىقتار! قازىر الماتى قالاسىنداعى اتى جامان ىندەتكە بايلانىستى جاعداي وتە كۇردەلى بولىپ وتىر. سول كۇردەلى جاعدايدى 17 كۇن اۋرۋحانادا، ءموبيلدى ورتالىق دەگەن اۋرۋحانادا جاتىپ، ءوز كوزىممەن كورىپ، باستان كەشكەن ادام رەتىندە پىكىر ايتقىمىز كەلىپ وتىر. سول اۋرۋحانا كەرەۋەتىندە جاتىپ، ءبىز 17 كۇن بويى ءبىر نارسە عانا تىلەدىك. ول وسى ءبىزدىڭ باسىمىزدان كەشىپ جاتقان احۋالدى ادام باسىنا بەرمەگەي دەپ تىلەدىك جانە ەڭ الدىمەن، جاقىندارىمىزعا، بالالارىمىزعا، نەمەرەلەرىمىزگە وسى نارسەنى كورسەتپەگەي دەپ تىلەدىك. الماتى قالاسىندا بۇل ىندەتتى جۇقتىرۋ دەڭگەيى قازىر وتە جوعارى، سوندىقتان دا الماتىلىقتاردىڭ توي، باسقوسۋ، جانازا، سودان كەيىن اسىرەسە، جاستاردىڭ باسقوسۋى توقتاماي تۇر شىنىن ايتقاندا. ونى ءوز كوزىمىزبەن كوردىك، ونداي تراگەديانىڭ شەت جاعاسىن كوزبەن كورىپ وتىرمىز. مىنەكەي وسىنداي جاعدايدا ماسكا كيىپ ءجۇرۋ، ادام كوپ جينالعان جەرگە بارماۋ، بارا قالسا ارا قاشىقتىقتى ساقتاۋ، ياعني، كارانتين ءتارتىبىن ساقتاۋ بارىمىزگە مىندەت دەگىمىز كەلەدى. ونى ساقتاماۋ تەك قانا قاسىرەتكە الىپ كەلەتىنىن كوزبەن كورىپ وتىرمىز. امان بولىڭىزدار، اعايىن!»، - دەدى س. ەلۋباي.
