ۇكىمەت باسشىسى اۋرۋحانالاردى وكپەنى جاساندى جەلدەتۋ اپپاراتتارىمەن قامتۋدى تاپسىردى

نۇر-سۇلتان. قازاقپارات - پرەمەر-مينيستر اسقار مامين تامىز ايىنىڭ سوڭىنا دەيىن اۋرۋحانانىڭ ءبارىن وكپەنى جاساندى جەلدەتۋ اپپاراتتارىمەن قامتاماسىز ەتۋدى تاپسىردى، دەپ حابارلايدى قازاقپارات ءتىلشىسى.

«باياندامالاردان بايقاعانىمىزداي، ەپيدەميولوگيالىق جاعدايدىڭ ءبىرشاما تۇراقتانۋ دەڭگەيىنە شىققانى بايقالادى. رەسپۋبليكا بويىنشا كوروناۆيرۋس جۇقتىرعانداردىڭ ءوسىمى تاۋلىگىنە - 2,1 پايىز. ال كەي وڭىرلەردە ودان دا از. مىسالى، شىمكەنتتە - 1 پايىز، قىزىلوردا وبلىسىندا - 0,9 پايىز، تۇركىستان وبلىسىندا - 0,8 پايىز، اقتوبە وبلىسىندا - 0,5 پايىز. قازىرگى باستى مىندەت - بارلىق وڭىردە اۋرۋ جۇقتىرۋ دەڭگەيىن ورنىقتى تومەندەتۋ»، - دەدى اسقار مامين ۇكىمەت وتىرىسىندا.

پرەمەر-ءمينيستردىڭ ايتۋىنشا، مەملەكەت باسشىسىنىڭ تاپسىرماسىنا سايكەس ساپالى ءارى قولجەتىمدى تولىق كولەمدەگى مەديتسينالىق كومەكتى، اسىرەسە اۋىلداردا قامتاماسىز ەتۋ بويىنشا ءبىرقاتار شارالار قابىلداۋ كەرەك.

«بىرىنشىدەن دەنساۋلىق ساقتاۋ، يندۋستريا مينيسترلىگى جانە اكىمدىكتەر تامىزدىڭ سوڭىنا دەيىن وڭىرلەردەگى اۋرۋحانالاردى وكپەنى جاساندى جەلدەتۋ اپپاراتتارىمەن قامتاماسىز ەتسىن. دەنساۋلىق ساقتاۋ مينيسترلىگى اكىمدىكتەرمەن جانە اۋىل شارۋاشىلىعى مينيسترلىگىمەن بىرگە شىلدەنىڭ سوڭىنا دەيىن وڭىرلەردە ۆەتەرينارلىق زەرتحانالار بازاسىندا كوروناۆيرۋسقا تەستىلەۋ جونىندەگى جۇمىستى ۇيىمداستىرسىن جانە كادرلارمەن جاساقتاسىن»، - دەدى اسقار مامين.