كوروناۆيرۋسكە قارسى ۋىتتى دارىلەر قابىلداعاندار باقىلاۋدا بولۋى كەرەك

الماتى. قازاقپارات - كوروناۆيرۋستى ەمدەۋگە قولدانىلاتىن دارىلىك زاتتاردىڭ ءبىرازى ۋىتتى بولۋى مۇمكىن.

بريفينگ بارىسىندا جۋرناليستەر سپيكەردەن شەتەلدىك باسىلىمداردا كوروناۆيرۋسكە قارسى قولدانىلاتىن كەيبىر دارىلىك زاتتاردىڭ ۋىتتى دەپ كورسەتىلگەنىن العا تارتتى. ال ونداي توكسيندى دارىلەردىڭ كەيبىرى قازىر قازاقستاندا دا قولدانىلادى. سوندىقتان دا، جۋرناليستەر تاراپىنان ونداي توكسيندى دارىلەرگە نەگە رۇقسات ەتىلگەنى سۇرالدى.

«ءبىز قولدانىپ جۇرگەن پاراتسەتامول دا - توكسيندى پرەپارات. قازىر بەرىلىپ جاتقان دارىلەر كوبىنە ستاتسيوناردا ەمدەۋگە ارنالعان. بۇل دارىلەردى قابىلداۋ كەزىندە دارىگەردىڭ باقىلاۋىندا بولۋ كەرەك. كوپ دارىلەر پاتسيەنتكە الدىن الا ءتۇسىندىرىلىپ، ايتىلعان سوڭ ونىڭ كەلىسىمىمەن بەرىلەدى. ءبىز ءدارىنىڭ پايداسى قاۋپىنەن اسىپ تۇسكەن جاعدايدا عانا تاعايىندايمىز. قاۋپى جوعارى بولسا، بەرىلمەيدى»، - دەدى تامارا ۋتاعانوۆا.