ەلوردا تۇرعىنى: اكەمدى ەمدەگەن دارىگەرلەر سوعىستا جۇرگەندەي ءار ناۋقاستىڭ ءومىرى ءۇشىن كۇرەستى

نۇر-سۇلتان. قازاقپارات - ەلوردا تۇرعىنى اكەسىن كوروناۆيرۋستان ەمدەگەن دارىگەرلەرگە العىس ايتتى، دەپ حابارلايدى قازاقپارات ءتىلشىسى.

«ءوزىمنىڭ جانە اكەم ورازعالي ابدرايموۆتىڭ اتىنان نۇر-سۇلتان قالاسىنىڭ №3-بالالار جۇقپالى اۋرۋلار اۋرۋحاناسىنىڭ قىزمەتكەرلەرىنە، اتاپ ايتقاندا ءبولىم مەڭگەرۋشىسى گۇلميرا نۇرتازيناعا، ەمدەگەن دارىگەر گاۋھار قۇتتىبەككە، سونداي-اق كىشى مەديتسينالىق پەرسونال نۇربانۋ مۇساحمەتوۆاعا، مەرۋەرت بايكەنوۆاعا ەڭبەگى ءۇشىن العىس ايتامىن. ءار كۇن سايىن ادام جانىن اجالدان اراشالاپ جاتىرسىزدار»، - دەپ جازدى عاليا ابدرايموۆا Facebook پاراقشاسىندا.

ونىڭ ايتۋىنشا، اكەسى كوروناۆيرۋس دەرتىنە شالدىققان.

«اكەم 11 كۇن بويى ۇيدە حاتتاما بويىنشا ەمدەلدى، ءبىراق دەنساۋلىق جاعدايى جاقسارعان جوق. ستاتسيوناردا قالاي ەمدەيتىنى تۋرالى جاعىمسىز پىكىرلەردى وقىعاننان كەيىن اۋرۋحاناعا بارۋعا قورىقتىق»، - دەيدى ەلوردا تۇرعىنى. ءبىراق دارىگەرلەر تالداۋ قورىتىندىسىن قاراعان سوڭ اكەسىن اۋرۋحاناعا جاتقىزۋعا كوندىرگەن.

«دارىگەرلەر اكەمە زاماناۋي مەديتسينالىق كومەك كورسەتتى. كۇن سايىن ەمدەيتىن دارىگەرى مەن ءبولىم مەڭگەرۋشىسى ناۋقاستاردىڭ قال- جاعدايىن سۇراپ، جاعدايىنا قاراي ەم جازىپ بەرىپ وتىردى. ولار ناۋقاستارعا رۋحاني كومەك كورسەتتى، بۇل اۋىرىپ جاتقان ناۋقاستار ءۇشىن وتە ماڭىزدى دۇنيە. دارىگەرلەر سوعىس الاڭىندا جۇرگەندەي ءار ناۋقاستىڭ ءومىرى ءۇشىن كۇرەسۋدە. ءوز ءىسىنىڭ شەبەرلەرىنىڭ ەمىن العان اكەمنىڭ جولى بولدى. سىزدەرگە جانە جاقىندارىڭىزعا دەنساۋلىق تىلەپ، الدارىڭىزدا باسىمدى يەم»، - دەيدى ول.