ەلوردا تۇرعىندارى مەن قوناقتارى كارانتيننەن كەيىن قايدا بارىپ سۋعا تۇسە الادى؟

نۇر- سۇلتان. قازاقپارات - ەلوردادا ريەۆيزيا جۇرگىزگەن كوميسسيا تۇرعىندارى شومىلۋعا رۇقسات ەتىلەتىن ءۇش ورىندى بەلگىلەدى.

كارانتين رەجيمى توقتاتىلعاننان كەيىن ەلوردا تۇرعىندارى مەن قوناقتارى بەلگىلەنگەن ورىنداردا عانا سۋعا تۇسە الادى.

بۇل تۋرالى نۇر-سۇلتان قالاسىنىڭ توتەنشە جاعدايلار دەپارتامەنتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.

«بۇگىنگى تاڭدا ەلوردادا كوميسسيا تەكسەرۋىنىڭ قورىتىندىسى بويىنشا حالىققا ارنالعان 23 شومىلۋ ورنى بەلگىلەندى. ولاردىڭ ازىرگە ۇشەۋىنە سۋعا شومىلۋعا رۇقسات ەتىلگەن. ولار: ورتالىق جاعاجاي، «تري پەسكاريا» مەن «ستوليچنىي دۆور» دەمالىس ورنى.

كارانتين رەجيمى توقتاتىلعاننان كەيىن ەلوردا تۇرعىندارى مەن قوناقتارى كورسەتىلگەن وسى ورىنداردا عانا سۋعا تۇسە الادى. قالعان 20 ورىندا قالالىق ءماسليحاتتىڭ 2017-جىلعى 12- جەلتوقسانداعى شەشىمىنىڭ 8-تارماعىنا سايكەس شومىلۋعا تىيىم سالىنادى.

بۇگىنگى تاڭدا الدىن الا انىقتالعان قالانىڭ ءتورت اۋدانىندا، اتاپ ايتقاندا «الماتى-3، بايقوڭىر-1، ەسىل-3، سارىارقا-3 تە تەگىن كوممۋنالدىق جاعاجايلاردى اشۋ ماسەلەسى پىسىقتالۋدا»، - دەپ حابارلايدى ۆەدومستۆونىڭ باسپا ءسوز قىزمەتىنەن.

9- مامىردان باستاپ قالا اۋماعىندا اكىمدىكپەن بىرگە 146 تىيىم سالۋ بەلگىسى، 20 اقپاراتتىق ستەند، 20 قالقىمالى سۋبەلگى ورناتىلعان. 14 قايىق پەن سۇڭگۋىرلەر توبى كەزەكشىلىكتە ءجۇر.

«وسىلايشا، نۇر-سۇلتان قالالىق توتەنشە جاعدايلار دەپارتامەنتى مەن پوليتسيا دەپارتامەنتىنىڭ قىزمەتكەرلەرى، «استانا جاستارى»، «قىزىل كرەست»، «جاس وتان» ەرىكتىلەرى 842 ادامنىڭ قاتىسۋىمەن 271 رەيد وتكىزگەن. وسى جۇمىستاردىڭ ارقاسىندا سۋعا ءتۇسۋ ەرەجەلەرىن بۇزعانى ءۇشىن 80 ادام اكىمشىلىك جاۋاپكەرشىلىككە تارتىلعان. قالا مەكتەپتەرىندە 3250 وقۋشىنى قامتىعان 5 ينتەراكتيۆتى ساباق وتكىزىلدى، 5690 ءۇنپاراق پەن بروشيۋرا تاراتىلدى»، - دەپ اتاپ ءوتتى باسپا ءسوز قىزمەتىنەن.

نۇر-سۇلتان قالاسىنىڭ توتەنشە جاعدايلار دەپارتامەنتى سۋعا ءتۇسۋ ۋاقىتىندا اتا-انالارعا بالالارىن نازاردان تىس قالدىرماۋ كەرەكتىگىن ەسكەرتەدى.