قىزىلوردالىق ونەرتاپقىش بالامالى ەنەرگيا كوزىن تاپتى
بۇل ماقساتتا ول قاراپايىم زاتتار مەن قۇرالداردى پايدالاندى، دەپ حابارلايدى قازاقپارات ءتىلشىسى.
وتىز جاستاعى ونەرتاپقىش ءوزى جاساپ شىعارعان قوزعالتقىشتىڭ وندىرىستە ونىمدىلىكتى ارتتىراتىنىنا سەنەدى.
ونىڭ ويىنشا وسى جەتىستىكتىڭ ناتيجەسىندە ۇلكەن قالالارداعى ەكولوگيالىق احۋالدى جاقسارتۋعا مۇمكىندىك تۋادى. ونەرتاپقىش بۇل جوبانى بەس جىلدان بەرى جوسپارلاپ جۇرگەن.
الدىمەن يدەياسىن قاعاز بەتىنە ءتۇسىرىپ، ونىڭ فورمۋلاسىن جاساپ شىعاردى. قۇرىلعى سۋمەن قۋات وندىرە الادى. سول ارقىلى ءىرى ءوندىرىس وشاقتارىن جارىقپەن قامتاماسىز ەتۋگە ابدەن بولادى.
ونەرتاپقىش اتالمىش جوبانى جاساۋعا بەلسەنە كىرىستى. ءتىپتى، ونىڭ بىرنەشە نۇسقاسى جاسالىپ شىقتى.
«ايتا كەتەيىن، مەن بۇل جوبانىڭ قىرىققا تارتا نۇسقاسىن جاسادىم. كوپتەگەن قاتەلىكتەرگە كوزىم جەتتى. بۇل باعىتتا بىرنەشە سىناما جاساپ كوردىم. قۇرىلعى تەك ەلەكتر قۋاتىن ءوندىرىپ قويمايدى. ول سۋمەن قامتۋعا دا مۇمكىندىك تۋعىزادى. وسىلايشا، ونى ەكى فۋنتسيانى اتقارۋعا پايدالانۋعا بولادى»، - دەدى مارات پالماحوۆ.
ونىڭ ايتۋىنشا، بۇل قۇرىلعىنى شالعاي ەلدى مەكەندەردە ەلەكتر قۋاتىمەن جابدىقتاۋ ماقساتىندا پايدالانۋعا بولادى. سونداي-اق، بيىك جەردە ورنالاسقان ەگىس القاپتارىن اتالعان قۇرالدى پايدالانۋ ارقىلى سۋارۋعا مۇمكىندىك بار.
ول كليماتتىق جاعدايعا ەشبىر تاۋەلدى ەمەس. وعان كۇننىڭ ساۋلەسى مەن جەلدىڭ كۇشىنىڭ قاجەتى جوق. سۋ كوزى مەن ونىڭ ساعاسى بولسا جەتىپ جاتىر. سوندىقتان ارتىق شىعىن كەتپەيدى.
ونەرتاپقىش بۇل ماقساتتا پاتەنت الۋدى ويلاستىرىپ ءجۇر. ەكولوگيالىق تازا قۇرىلعى الداعى ۋاقىتتا وندىرىسكە ەنگىزىلەتىنىنە سەنەدى.