قاراعاندىعا ون جەتى توننا ءدارى-دارمەك جەتكىزىلدى
ءدارى- دارمەكتەر چارتەرلىك رەيسپەن رەسەيلىك نيجنيي نوۆگورود قالاسىنان جەتكىزىلدى. اۆيارەيس قاراعاندى وبلىستىق اكىمدىگى جانە «قازاقمىس» كورپوراتسياسىنىڭ قولداۋىمەن ۇيىمداستىرىلدى. مەديتسينالىق پرەپاراتتاردىڭ جالپى سالماعى 17 توننانى قۇرايدى.
دارىلەردىڭ جارتىسى، ياعني 8,5 تونناسى قاراعاندى وبلىسقا ارنالعان. جۇكتىڭ قالعان بولىگى پاۆلودار جانە نۇر- سۇلتان قالالارىنا جونەلتىلەدى. بۇل تاۋار گۋمانيتارلىق كومەك ەمەس.
مەديتسينالىق زاتتاردى ءدارىحانا جەلىلەرىنىڭ ديستريبيۋتورى ساتىپ الىعان. اكىمدىك ءدارى- دارمەكتەردى ساتىپ الۋ جانە ەنگىزۋ پروتسەدۋرالارىن جەڭىلدەتۋ جانە لوگيستيكا جونىندەگى ماسەلەلەرگە قولداۋ كورسەتتى.
اتالمىش پارتيا ستاتسيونارلار مەن ءدارىحانالارعا تاراتىلادى. بۇل جولى تۇرعىندار اراسىندا اسا قاجەت بولىپ وتىرعان پرەپاراتتار ساتىپ الىندى.
ولار: سەفترياكسون، رەامبەرين، كلەكسان، پرەدنيزولون، سيكلوفەرون، ازيتروميتسين جانە ىستىقتى باساتىن دارىلەر. جاقىن ۋاقىتتا ءدارى-دارمەكتەر قاراعاندى وبلىسىنىڭ ءدارىحانالارىنا جانە قالالار مەن اۋدانداردىڭ ستاتسيونارلارىنا جەتكىزىلەدى.
سونداي-اق وڭىرىمىزگە 700 مىڭ قاپتاما پاراتسەتامول جەتكىزىلەدى دەپ كۇتىلۋدە. وبلىس تۇرعىندارىنىڭ قاجەتتىلىگىن وتەۋگە ارنالعان ءدارى- دارمەكتەردى جەتكىزۋ بويىنشا جۇمىستار تۇراقتى تۇردە جالعاساتىن بولادى.
