اسكەريلەر ەلىمىزدىڭ ءبىرقاتار وڭىرىندە دەزينفەكتسيالاۋ جۇمىستارىن باستادى

نۇر-سۇلتان. قازاقپارات - ەلىمىزدىڭ قارۋلى كۇشتەرى جەرگىلىكتى اتقارۋشى ورگاندار مەن توتەنشە جاعداي ورگاندارىنا گارنيزوندارىندا دەزينفەكتسيالىق جۇمىستار جۇرگىزۋگە كومەك كورسەتۋدى قايتا باستادى، دەپ حابارلايدى قورعانىس مينيسترلىگىنىڭ باسپا ءسوز قىزمەتى.

قازىرگى تاڭدا اقمولا، اقتاۋ، اتىراۋ، قىزىلوردا، تاراز جانە شىمكەنت گارنيزوندارىندا وڭدەۋ جۇمىستارى قولعا الىندى.

ەلدى مەكەندەردى وڭدەۋگە جۇمىلدىرىلعان قۇراما جاساق ارنايى تەحنيكامەن، ارس-14 اۆتو قۇيۋ ستانتسيالارىمەن، وڭدەۋ جيىنتىعىمەن جانە دەزينفەكتسيالاۋ قۇرالدارىمەن قامتاماسىز ەتىلگەن. وتكەن اپتادا جالپى اۋدانى 751 مىڭ شارشى مەتردەن اساتىن 450-دەن استام الەۋمەتتىك ماڭىزى بار جانە باسقا دا نىساندار دەزينفەكتسيالاندى.

اكىمدىكتەردىڭ وتىنىمدەرى بويىنشا 18- شىلدەدە دەزينفەكتسيالاۋ جۇمىستارى اقتاۋ، اتىراۋ جانە نۇر-سۇلتاندا جۇرگىزىلەدى.

اسكەري قىزمەتشىلەر تاڭەرتەڭ جۇمىستارىن باستاپ، 27 الەۋمەتتىك ماڭىزى بار جانە 35 قالالىق نىسانداردى وڭدەيدى. قالا تۇرعىندارى كوپ جينالاتىن جەرلەرگە دە ەرەكشە كوڭىل بولىنەدى.

وڭدەۋ جوسپارى جەرگىلىكتى اتقارۋشى ورگانداردىڭ وتىنىمدەرى بويىنشا قالىپتاسادى. دەزينفەكتسيالاۋ جۇمىستارىن 25- شىلدەگە دەيىن جالعاستىرۋ جوسپارلانىپ وتىر، ءبىراق قاجەتتىلىگىنە قاراي مەرزىمى ۇزارتىلۋى مۇمكىن.