الماتىعا كوروناۆيرۋسقا قارسى پرەپاراتتاردىڭ جاڭا پارتياسى جەتكىزىلدى

الماتى. قازاقپارات - الماتى اۋەجايىنا دارىلىك پرەپاراتتار تيەلگەن كەزەكتى بورت كەلىپ قوندى، دەپ حابارلايدى قازاقپارات قالا اكىمدىگىنىڭ باسپا ءسوز قىزمەتىنە سىلتەمە جاساپ.

جۇكتىڭ جالپى سالماعى - 32 توننا، وعان «ىڭكار» فارماتسيەۆتيكالىق كومپانياسى قالاداعى ءدارىحانالار جەلىسى ءۇشىن ءۇندىستاننان تاپسىرىس بەرگەن.

كومپانيا وكىلدەرىنىڭ مالىمدەۋىنشە، اۋەجايدا كوۆيدكە قارسى پرەپاراتتاردىڭ 242 مىڭ وراما كولەمىندەگى پارتياسى تۇسىرىلگەن. جۇك كەدەندىك تازالاۋدان ءوتىپ، قاجەتتى قۇجاتتار راسىمدەلگەن سوڭ، كومپانيانىڭ قويماسىنا جەتكىزىلەدى، ودان كەيىن ءدارىحانالار جەلىسىنە اپارىلادى.

كومپانيادان سونداي-اق ارنايى تۇراقتاندىرۋ قورىنا دارىلىك زاتتاردى ساتىپ الۋ مەحانيزمى ىسكە اسىرىلا باستاعانىن حابارلادى.

ەسكە سالا كەتەيىك، الماتى قالاسىنىڭ اكىمى باقىتجان ساعىنتايەۆتىڭ تاپسىرماسى بويىنشا قاجەتتى ءدارى-دارمەكتەردى ساتىپ الۋ ءۇشىن فارمكومپانيالاردى پايىزسىز نەسيەلەندىرۋ ماقساتىنا 5 ميلليارد تەڭگە بولىنگەن. بۇل قاراجات قايتارىمدى.

بەلگىلى بولعانداي، شىلدە ايىنىڭ باسىندا قالانىڭ كەيبىر ءدارىحانالارىندا قىزۋ تۇسىرەتىن جانە وزگە دە پرەپاراتتاردىڭ تاپشىلىعى بايقالعان. الايدا شۇعىل شارالاردىڭ ارقاسىندا جاعداي تۇراقتاندى.

بۇدان باسقا، قالانىڭ تۇراقتاندىرۋ قورىنان covid-كە قارسى ستاتسيونارلارعا ءدارى-دارمەك جەتكىزۋ بويىنشا جۇمىس باستالىپ كەتتى. بۇرىن حابارلانعانداي، شىلدە ايىنىڭ سوڭىنا دەيىن الماتىعا covid-كە قارسى پرەپاراتتاردىڭ شامامەن 6,5 مىڭ وراماسى جەتكىزىلەدى.

16- شىلدەنىڭ كەشىندە قالاعا ءۇندىستاننان جالپى سالماعى 10 توننانى قۇرايتىن مەديكامەنتتەر تيەلگەن ۇشاق، ال 17- شىلدەدە اۋەجايدا 23 توننا ءدارى-دارمەكتى جەتكىزگەن رەسەي فەدەراتسياسىنىڭ اۋە كەمەسى كەلىپ قونعان.