تۇركىستانداعى «ازىرەت سۇلتان» قورىق-مۋزەيىنە قاراستى تاريحي-مادەني ورىنداردى قايتا جاڭعىرتىلىپ جاتىر

وسىعان وراي بۇگىندە تاريحي ەسكەرتكىشتەردى قايتا جاڭعىرتۋ جۇمىستارى مەن ارحەولوگيالىق قازبا جۇمىستارى جۇرگىزىلۋدە، دەپ حابارلايدى قازاقپارات ءتىلشىسى.

قازىرگى تاڭدا كەشەندى عىلىمي، رەستاۆراتسيالىق جۇمىستاردىڭ ناتيجەسىندە قوجا احمەت ياساۋي كەسەنەسىنىڭ قابىرحانا، قازاندىق، ۇلكەن اقساراي، قابىرحانا، قۇدىقحانا بولمەلەرىن اقتاۋ جۇمىستارى جۇرگىزىلدى. سونداي-اق، قوجا احمەت ياساۋي كەسەنەسىنىڭ كۇمبەزى، كازارما، رابيا سۇلتان بەگىم كەسەنەسى، شىعىس مونشاسى، جۇما مەشىتى، داربازا قاقپاسى، حان مەشىتى، جەتى اتا قاقپاسى، قىلۋەت جەر استى مەشىتتەرىندە رەستاۆراتسيالاۋ جۇمىستارى قارقىندى جۇرۋدە.

XI- XII عاسىرداعى 40 مەشىتتىڭ ىشىنەن قازىرگى زامانعا دەيىن جەتكەن جالعىز ءدىني ورىن جۇما مەشىتىن ميحرابىمەن بىرگە تولىعىمەن جاڭعىرتۋ جانە اعاش باستىرماسىن كەڭەيتۋ جۇمىستارى دا جوسپارلانعان.

ال، مەشىتتىڭ وڭتۇستىك- شىعىس قابىرعالارىنا دەمونتاج جۇمىستارى قولعا الىناتىن بولادى.

XI- XII عاسىرعا ءتان قىلۋەت جەراستى مەشىتىن قايتا جاڭعىرتۋ بارىسىندا عيماراتتىڭ نەگىزگى سالماق تۇسەتىن قۇرىلىمدارى مەن جەراستى قۇرىلىسىنىڭ ىرگەسىن كەڭەيتۋ جۇمىستارى جاسالۋدا.

سونىمەن قاتار XV عاسىردىڭ تاريحي جادىگەرى ورتاعاسىرلىق شىعىس مونشاسى مەن كۇمبەزدىڭ جۇقا قاباتىن، ينتەرەرىن رەستاۆراتسيالاۋ، ەكىنشى ەسىكتى سالۋ جانە ىرگەلەس اۋماقتى اباتتاندىرۋ جوسپارلانىپ وتىر.

كازارما ساۋلەتتىك عيماراتىنا 2000-جىلدان بەرى كۇردەلى جوندەۋ جۇرگىزىلمەگەن بولاتىن. قازىرگى تاڭدا ساۋلەت ەسكەرتكىشىنىڭ شاتىرى تولىعىمەن اۋىستىرىلىپ جاتىر.