ەلىمىزدىڭ ءبىرقاتار وڭىرىندە كوشەدە، دۇكەندە ءدارى ساتقاندار ۇستالدى

بۇل تۋرالى ق ر سىبايلاس جەمقورلىققا قارسى ءىس- قيمىل اگەنتتىگى پاراساتتىلىق دەپارتامەنتىنىڭ ديرەكتورى عانيجان اسان ۇلى ايتتى، دەپ حابارلايدى قازاقپارات ءتىلشىسى.

«انىقتالعان كەلەسى بۇزۋشىلىق - ول ءدارى- دارمەكتەردى ارنايى مامانداندىرىلعان ورىنجاي مەن ءدارىحانالاردان تىس جەرلەردە ساتۋ. قولدانىستاعى زاڭناما تالاپتارىنا سايكەس ءدارى- دارمەكتەردى تەك ءدارىحانا قويمالارىندا جانە ءدارىحانالاردا ساتۋعا بولادى. وسى تالاپتى بۇزعاندارعا 194460 تەڭگە كولەمىندە ايىپپۇل قاراستىرىلعان. وسىعان قاراماستان جامبىل وبلىسىندا ءدارىحانالاردا تاپشى بولىپ وتىرعان پاراتسەتامول جانە تاعىدا باسقا انتيبيوتيكتەر بازارلاردا ءتيىستى رۇقساتسىز ساتىلعان. وسى وڭىردە وبلىس ورتالىعىنىڭ تۇرعىنى سەف-3 پرەپاراتىنىڭ 30 امپۋلاسىن كوشەدە، ال ەكىنشىسى «اسپيريندى» دۇكەندە ساتقان»، - دەدى ول اگەنتتىكتىڭ باسپا ءسوز قىزمەتى الاڭىندا وتكەن بريفينگ بارىسىندا.

ونىڭ دەرەگىنشە، شىعىس قازاقستان وبلىسىندا دارىلىك زاتتار مەن مەديتسينالىق بۇيىمداردى ينتەرنەت ارقىلى ارنايى رۇقساتسىز ساتۋ فاكتىسى انىقتالدى.

«ازاماتتاردىڭ مامانداندىرىلماعان ورىنجايدا دارىلىك زاتتاردى جوعارى قۇنمەن ساتۋ فاكتىسى قوستاناي، پاۆلودار وبلىستارىندا دا تىركەلگەن. بارلىق ءدارى- دارمەكتەر تاركىلەنىپ، قۇقىق بۇزۋشىلارعا قاتىستى اكىمشىلىك قۇقىق بۇزۋشىلىق كودەكسىنىڭ 424-بابى بويىنشا 3 اكىمشىلىك ءىس قوزعالدى»، - دەدى عانيجان اسان ۇلى.