كوروناۆيرۋس جۇقتىرعان ناۋقاستارعا نەگە تەلەفون ۇستاۋعا بولمايدى؟
نۇر-سۇلتان. قازاقپارات - الەۋمەتتىك جەلىدە كوروناۆيرۋس جۇقتىرعان ناۋقاستاردىڭ تۋىستارى جاقىندارىنا حابارلاسىپ، جاعدايىن بىلە الماي وتىرعانىن ايتىپ، شاعىمداندى، - دەپ حابارلايدى «موي گورود».
جۇقپالى اۋرۋلار ستاتسيونارىندا جاتقان ناۋقاستاردىڭ تەلەفونىن الىپ قوياتىن بولىپ شىققان. باتىس قازاقستان وبلىسىنىڭ دەنساۋلىق ساقتاۋ باسقارماسى ستاتسيونار جاعدايىندا ۇيالى تەلەفوندار ۆيرۋس جۇقتىرۋدىڭ ءبىر جولى بولۋى مۇمكىن ەكەنىن ايتتى.
«ەلىمىزدە كوروناۆيرۋس جۇقتىرعانداردىڭ سانى كۇن سايىن ارتىپ كەلەدى. بۇگىندە ۆيرۋستان ءبىراز ادام قايتىس بولدى، كوپتەگەن ادام جاقىندارىنان، دوستارىنان ايىرىلدى. جەلىدە ستاتسيونارلاردىڭ بىرىندە ناۋقاستاردىڭ تەلەفونىن الىپ قوياتىنى تۋرالى اقپارات تارادى. ۇيالى تەلەفوندار ۆيرۋس جۇقتىرۋدىڭ نەگىزگى جولى ەمەس، ءبىراق ستاتسيونار جاعدايىندا مۇمكىن جولداردىڭ ءبىرى. سەبەبى ەشكىم تەلەفونىن انتيسەپتيكپەن تازالامايدى. ال ۆيرۋس ادام كوپ قولداناتىن، كوپ ۇستايتىن زاتتاردا قالادى.
قازىر بارلىق ادام ءۇشىن باستى ەرەجە - سانيتارلىق ەرەجەنىڭ ساقتالۋى. اركىم ءوز دەنساۋلىعىنا ءوزى جاۋاپتى»، - دەيدى ب ق و دەنساۋلىق ساقتاۋ باسقارماسىنىڭ وكىلدەرى.
