يلون ماسك الەمدەگى ەڭ باي ادامدار وندىعىنا كىردى
نۇر-سۇلتان. قازاقپارات - Tesla جانە SpaceX كومپانيالارىن باسقاراتىن امەريكاندىق كاسىپكەر يلون ماسك Forbes جۋرنالىنىڭ نۇسقاسى بويىنشا العاش رەت عالامشارداعى ەڭ باي ادامدار «وندىعىنا» كىردى، دەپ حابارلايدى قازاقپارات اتالمىش باسىلىمنىڭ سايتىنا سىلتەمە جاساپ.
قازىرگى كەزدە ماسكتىڭ داۋلەتى 70,8 ميلليارد دوللارعا باعالانىپ وتىر. Forbes ونىڭ بايلىعىنىڭ ءوسۋى كوبىنە Tesla اكتسيالارى باعاسىنىڭ كۇرت كوتەرىلۋىنە بايلانىستى ەكەنىن اتاپ ءوتتى.
NASDAQ ەلەكتروندى بيرجاسىنىڭ سايتىندا جاريالانعان مالىمەتتەر بويىنشا، ناۋرىز ايىنىڭ ورتاسىندا كومپانيانىڭ ءبىر اكتسياسىنىڭ باعاسى 400 دوللاردان اسپاعان بولسا، سارسەنبى كۇنى ساۋدا جابىلار كەزدە ول ءتىپتى 1541 دوللاردان دا جوعارى.
قازىرگى ۋاقىتتا Forbes ماسكتى عالامشاردىڭ ەڭ باي ادامدار تىزىمىندە سەگىزىنشى ورىنعا قويىپ وتىر. تىزىمدە توعىزىنشى ورىندى داۋلەتى 68,5 ميلليارد دوللاردى قۇراپ وتىرعان ۇندىلىك Reliance Industries حولدينگىنىڭ باسشىسى مۋكەش امباني ەنشىلەسە، «وندىقتى» Google كومپاياسىنىڭ نەگىزىن قالاۋشىلاردىڭ ءبىرى لارري پەيدج (67,7 ميلليارد دوللار) تۇيىندەدى.
