نۇر-سۇلتاندا جۇمىسپەن قامتۋدىڭ جول كارتاسى اياسىندا ەڭ قاجەتتى ماماندىقتار بەلگىلى بولدى

ماسەلەلەردى شەشۋدە ءتيىمدى باعدارلامالاردىڭ ءبىرى - جۇمىسپەن قامتۋدىڭ جول كارتاسى.

حالىقتى جۇمىسپەن قامتۋ ورتالىعىنىڭ مونيتورينگ جانە ەڭبەك رەسۋرستارىن بولجاۋ ءبولىمىنىڭ باسشىسى ينديرا شايماردانوۆا بريفينگ بارىسىندا اتاپ وتكەندەي، قازىرگى ۋاقىتتا قول ەڭبەگىنە سۇرانىس جوعارى.

«جۇمىسپەن قامتۋدىڭ جول كارتاسى بويىنشا ەڭ قاجەت ماماندار دانەكەرلەۋشى، اعاش ۇستاسى، مۇنارا كرانىنىڭ جۇرگىزۋشىسى، سىلاقشى، ارماتۋرشى، اعاش شەبەرى، بەتونشى، سانتەحنيك، مەحانيزاتور، B ، C ، D، E ساناتىنداعى جۇرگىزۋشىلەر، قوسالقى جۇمىسشىلار، باعبانشى، جول سالۋشى جۇمىسشىلار، مونتاجشىلار جانە ەلەكتريكتەر»، - دەدى ي. شايماردانوۆا.

ونىڭ ايتۋىنشا، باعدارلاما بويىنشا جۇمىسقا ورنالاسقانداردىڭ جالاقىسى بىلىكتىلىك دەڭگەيىنە بايلانىستى 85 تەن 250 مىڭ تەڭگەگە دەيىن. قازىر 132 جوبانىڭ 95 ءى ىسكە قوسىلدى، كاسىپورىندارمەن 101 حاتتاماعا قول قويىلدى.

«ءبىزدىڭ جۇمىسشىلار جول سالۋ، الاڭداردى قايتا قۇرۋ، عيماراتتاردى، اۋرۋحانالاردى، مەكتەپتەردى، بالاباقشالاردى كۇردەلى جانە اعىمداعى جوندەۋ، بالالار الاڭدارىن قايتا قۇرۋ جۇمىستارىن جۇرگىزۋدە»، - دەدى ي. شايماردانوۆا.

بۇگىنگى تاڭدا جۇمىسپەن قامتۋ ورتالىقتارى ارقىلى 3350 ادام جۇمىسقا ورنالاستىرىلدى. جالپى، نۇر-سۇلتان قالاسىندا جۇمىسپەن قامتۋدىڭ جول كارتاسى اياسىندا 2020-جىلى 15 مىڭنان استام جاڭا جۇمىس ورنىن قۇرۋ جوسپارلانعان. %50 نەمەسە 7628 ادام جۇمىسپەن قامتۋ ورتالىعى ارقىلى جۇمىسقا ورنالاستىرىلادى. سونداي-اق ماماندار مەردىگەرلەرمەن ەلەكتروندى ەڭبەك كەلىسىمشارتتارىن ۋاقىتىلى تولتىرۋدى جۇزەگە اسىرادى.

22- ماۋسىمدا جۇمىسپەن قامتۋ ورتالىعى ونلاين رەجيمدە جۇمىس ىستەۋگە كوشكەندىكتەن، «جۇمىسپەن قامتۋدىڭ جول كارتاسى» ارقىلى جۇمىس تاپقىسى كەلەتىندەر ورتالىقتىڭ Call-ورتالىعىنا 578888 تەلەفونى ارقىلى حابارلاسۋى كەرەك. سونداي-اق مونيتورينگ جانە ەڭبەك رەسۋرستارىن بولجاۋ بولىمىنە مىنا تەلەفوندار ارقىلى حابارلاسۋعا بولادى: 578889، 578937، 248302.