الماتىداعى سپورت كەشەنى گوسپيتال بولۋعا قالاي دايىندالىپ جاتىر

الماتى. قازاقپارات - الماتىدا Halyk Arena سپورت كەشەنى بازاسىندا كوروناۆيرۋستىق ينفەكسيامەن اۋىرعاندارعا ۋاقىتشا گوسپيتال اشىلادى. قازىر سپورت سارايىندا دايىندىق جۇمىستارى ءجۇرىپ جاتىر، دەپ حابارلايدى قازاقپارات ءتىلشىسى.

مۇنىڭ الدىندا دايىندىق جۇمىستارى تۋرالى ۆيدەو جاريالانعان بولاتىن. « Halyk Arena بازاسىندا ينفەكسيالىق ستاتسيونار ورىندارىن اشۋ ماجبۇرلىكتەن تۋعان شەشىم. اۋرۋحانالاردا ورىن جەتپەگەندىكتەن، وسىنداي قادامعا بارىپ وتىرمىز. وسىنداي قيىن ۋاقىتتا قالا قىزمەتتەرىنە كومەك كورسەتۋىمىز كەرەك. بۇل شارا كوپتەگەن ازاماتتاردىڭ ءومىرىن ساقتاپ قالۋعا كومەكتەسەدى دەپ سەنەمىز»، - دەدى سپورت سارايىنىڭ باسقارۋشى كومپانياسى.

قازىر سپورت سارايىندا جۇمىس ىستەپ تۇرعان سپورت سەكسيالارى، Halyk Arena كەشەنىن جالعا الۋشىلار ۋاقىتشا Almaty Arena كەشەنىنە كوشەدى. «سپورتشىلارعا دايىندىق كەزەڭىن ۇزۋگە بولمايدى. سوندىقتان، سپورت كەشەنىن جالعا الۋشىلاردىڭ Almaty Arena كەشەنىنە كوشۋىن قاراستىرۋدى سۇرادىق»، - دەدى ولار.

باسقارۋشى كومپانيا وكىلدەرى سپورت كەشەنىن وزگەرتۋگە بارىنشا مۇقيات بولعانىن ايتتى. «سپورت نىسانىن گوسپيتالگە اينالدىرۋ تەك ورىن بوساتۋ ەمەس، قاجەتتى ميكروكليمات جاساۋ، سانيتارلىق ايماقتار ءتۇزۋ، بولمەلەردىڭ جەلدەتىلۋىن، تازالىعىن قامتاماسىز ەتۋ بولىپ وتىر. باسقارۋشى كومپانيا سپورت نىسانىنىڭ قايتا ءوز پروفيلىنە ەشبىر نۇقسانسىز اۋىسۋىنا كەپىل بولادى»، - دەدى كومپانيادان.

ايتا كەتۋ كەرەك، بۇعان دەيىن قالالىق قوعامدىق دەنساۋلىق باسقارماسىنىڭ باسشىسى كامالجان نادىروۆ الماتىدا كوروناۆيرۋس بويىنشا ەپيدەميولوگيالىق احۋال كۇرت ناشارلاسا، HalykArena جانە الماتى Arena سپورت كەشەندەرى بازاسىندا ينفەكسيالىق ستاتسيونار اشىلاتىنىن حابارلاعان بولاتىن.

اۆتور: گۇلميرا عوسمانالي