شىمكەنت تۇرعىنىن ويىنشىق تاپانشامەن قورقىتىپ، اقشاسىن تارتىپ العاندار ۇستالدى

نۇر-سۇلتان. قازاقپارات - تۇركىستان وبلىسىنىڭ پوليتسەيلەرى فيرما وكىلىنە قاراقشىلىق شابۋىل جاساعان ەر ادامدى ۇستادى، دەپ حابارلايدى قازاقپارات.

سارىاعاش اۋداندىق پوليتسيا بولىمىنە شىمكەنت قالاسىنىڭ تۇرعىنى ارىزداندى. ەر ادام تۇسكى ۋاقىتتا ءوزىنىڭ «گازەل» كولىگىنە وتىرعان ساتتە وعان شابۋىل جاسالعان. مەديتسينالىق بەتپەردە كيگەن ەكى ادام ونى قارۋمەن قورقىتىپ، ىشىندە 700000 تەڭگەگە جۋىق اقشاسى بار سومكەسىن تارتىپ الىپ، ءىزىن سۋىتقان.

اتالعان جايتتى پوليتسيا قىزمەتكەرلەرى قىلمىستىق كودەكستىڭ 190-بابى بويىنشا تىركەدى.

جاسالعان قىلمىستىڭ اۋىرلىعى مەن اشىقتان-اشىق قورىقپاي جاسالعانىن ەسكەرە وتىرىپ، پوليتسيادا وسى اۋىر قىلمىستى اشۋعا باعىتتالعان جەدەل-تەرگەۋ توبى قۇرىلدى. اۋداندىق پوليتسەيلەرگە كومەك كورسەتۋ ءۇشىن وبلىستىق پوليتسيا دەپارتامەنتىنەن ءبىر توپ جەدەل-ىزدەستىرۋ توبى كەلدى.

پوليتسيا قىزمەتكەرلەرى ءبىر اپتا ىشىندە كۋاگەرلەردەن جاۋاپ الىپ، بەينەباقىلاۋ كامەراسىنىڭ جازبالارىن مۇقيات قاراپ، تەكسەرىپ شىقتى. ناتيجەسىندە جەدەل توپ مۇشەلەرى كۇدىكتىلەر مىنگەن اۆتوكولىك پەن ونىڭ مەملەكەتتىك ءنومىرىن انىقتادى.

الايدا، مەملەكەتتىك ءنومىر جالعان بولىپ شىقتى. پوليتسەيلەر قىلمىسكەرلەردى ىزدەستىرۋدى ارى قاراي جالعاستىردى. وسىلايشا ءتارتىپ ساقشىلارى كۇدىكتىلەردىڭ ءبىرىن شىمكەنت قالاسىنىڭ جالدامالى پاتەرىنەن ۇستادى.

ول مەگاپوليستىڭ ءۇش رەت سوتتالعان تۇرعىنى بولىپ شىقتى. ۇرلانعان اقشانى ءوز قاجەتىنە جۇمساعان. كۇدىكتى قاماۋدا.

قازىرگى ۋاقىتتا جەدەل-تەرگەۋ توبى قاراقشىلىق شابۋىلعا قاتىسۋشىنىڭ ەكىنشىسىن ۇستاۋ بويىنشا شارالار قابىلداۋدا. سونداي-اق، كۇدىكتىنىڭ جابىرلەنۋشىنى ويىنشىق تاپانشامەن قورقىتقانى انىقتالدى. قازىرگى ۋاقىتتا سوتقا دەيىنگى تەرگەۋ ءجۇرىپ جاتىر.