الماتىدا قايتىس بولعان ادامدارعا كوروناۆيرۋستان تەست جاسالمايتىن بولدى

الماتى. قازاقپارات - الماتى قالاسىنىڭ باس سانيتارلىق دارىگەرى جانداربەك بەكشيننىڭ جاڭا شەشىمىنە سايكەس، بۇدان بىلاي قايتىس بولعان ادامداردى كوروناۆيرۋسقا تەكسەرمەيدى، دەپ حابارلايدى قازاقپارات ءتىلشىسى.

«توتەنشە جاعدايدى قامتاماسىز ەتۋ جونىندەگى جەدەل شتاب وتىرىسىنىڭ 2020 -جىلعى 9 -ساۋىردەگى «قايتىس بولعان ادامداردان COVID-19 عا تەست الۋ الگوريتمىن بەكىتۋ تۋرالى» حاتتاما ءوز كۇشىن جويدى»، - دەلىنگەن قۇجاتتا.

ەگەر ادام اۋرۋحانادان تىس جەردە كوروناۆيرۋستان قايتىس بولسا، جەدەل جاردەم دارىگەرلەرى مەن پوليتسيا دەرەۋ ەپيدەمياعا قارسى رەجيمنىڭ تالاپتارىن ساقتاي وتىرىپ، قاجەتتى شارالاردى قابىلدايدى. سونداي-اق، ءمايىت كوروناۆيرۋسقا زەرتحانالىق تەكسەرۋدەن وتكىزىلمەيدى. COVID-19 دان قايتىس بولعان ادامنىڭ دەنەسى اشىلمايدى جانە تۋىستارىنا بەرىلمەيدى. مارقۇممەن تۋىستارى ارنايى بەلگىلەنگەن جەردە قوشتاسادى. ايتا كەتەيىك، قازاقستان بويىنشا بۇل دەرتتەن بارلىعى 147 ادام قايتىس بولدى.

اۆتور: الما مۇقانوۆا