قىتايمەن شەكاراداعى «نۇر جولى» بەكەتىندە كولىك جينالۋىنا نە سەبەپ بولدى

نۇر- سۇلتان. قازاقپارات - قر قارجى مينيسترلىگى «نۇر جولى» وتكىزۋ بەكەتىندە كولىكتىڭ جينالىپ قالۋىنا قىتاي تاراپىنىڭ شەكارادا سانيتارلىق شارالاردى كۇشەيتۋى سەبەپ بولىپ وتىرعانىن جاريا ەتتى، دەپ حابارلايدى قازاقپارات ءتىلشىسى.

«قازاقستاندىق تاراپ (ق ر ق م م ك ك، ق ر ۇ ق ك شەكارا قىزمەتى، ق ر يندۋستريا جانە ينفراقۇرىلىمدىق دامۋ مينيسترلىگى) «نۇر جولى» اۆتوكولىكتىك وتكىزۋ بەكەتىنىڭ جۇمىسىن تۇراقتاندىرۋ ءۇشىن ءتيىستى شارالاردى قابىلداپ جاتىر. قىتايلىق اۆتوكولىكتەردىڭ قازاقستان اۋماعىنا كىرۋ مۇمكىندىگى ءۇشىن «نۇر جولى» ا ء و ب جۇمىس تەحنولوگياسىن وزگەرتۋ ماسەلەسى پىسىقتالۋدا»، - دەپ حابارلايدى كوميتەتتەن.

جاڭا پروتسەدۋرالار ەكىجاقتى بەكىتىلگەننەن كەيىن قىتايلىق تاسىمالداۋشىلار ءوز ەلىندە وندىرىلگەن تاۋاردى قازاقستاننىڭ كولىك- لوگيستيكالىق ورتالىقتارىنا جەتكىزۋ مۇمكىندىگىنە يە بولادى. وسىدان كەيىن كەلگەن تاۋارلار قازاقستاندىق جانە شەتەلدىك ترانزيتتىك كولىكتەرگە تيەلىپ، ايماقتارعا تاراتىلادى. بۇل شارا كوپ اۆتوكولىكتىڭ قىتاي تاراپىنا كىرۋ قاجەتتىگىن جويىپ، «نۇر جولى» بەكەتىندە جۇك تاسىمالداۋشىلاردىڭ جينالۋىنا جول بەرمەيدى.

«قازاقستاندىق تاراپ قازاقستان مەن قىتاي شەكارالارى اراسىندا اۆتوكولىكتىڭ جينالىپ قالۋىنا COVID-19 پاندەمياسىمەن كۇرەس اياسىندا قىتايلىق تاراپتىڭ شەكاراداعى سانيتارلىق شارالاردىڭ كۇشەيتۋى سەبەپ بولعانىن اتاپ وتەدى. كورشى مەملەكەتتىڭ قاۋىپسىزدىك شارالارىنا قۇرمەتپەن قاراي وتىرىپ، قىتاي تاراپىنىڭ كارانتين شارالارىن ەنگىزۋى «نۇر جولى» بەكەتىن ەسەپتەمەگەندە بارلىق شەكارا وتكىزۋ بەكەتتەرىنىڭ جابىلۋىنا، شەكارا ارقىلى وتەتىن اۆتوكولىك سانىنىڭ 150 دەن 20 عا دەيىن قىسقارۋىنا اكەلگەنىن حابارلايمىز» دەلىنگەن حابارلامادا.

كوميتەت سونىمەن بىرگە ق ر ۇكىمەتىنىڭ 2020 -جىلدىڭ 10-ماۋسىمىنداعى №369-قاۋلىسىنا سايكەس بۇدان بۇرىن «قالجات»، «باقتى»، «مايقاپشاعاي» اۆتوكولىك وتكىزۋ بەكەتتەرى ۋاقىتشا جابىلعانىن حابارلايدى. ق ح ر تاراپى شەكارالاردى جاۋىپ تاستاعاندىقتان تاۋارلار ارى- بەرى تاسىمالدانىپ جاتقان جوق. ونىڭ ۇستىنە بۇرىن جۇكتى كۇتىپ قالۋمەن كولىك قۇرالدارى قىتاي اۋماعىندا جينالىپ قالاتىن. پاندەمياعا بايلانىستى ق ح ر بيلىگى مۇنى شەكتەپ، قازاقستاندىق كولىك قۇرالدارىنىڭ ءوز اۋماعىندا بولۋ ۋاقىتىن 12 ساعاتقا دەيىن قىسقارتقان.

«بۇل قازاقستاندىق تاراپتا كولىك قۇرالدارىنىڭ جينالۋىنا اكەلدى. قازاقستاندىق تاراپتا جۇك جينالىپ قالۋىنىڭ تاعى ءبىر سەبەبى - شەكارانى كەسىپ وتەتىن تاسىمالداۋشىلاردىڭ (شامامەن 60 پايىزىنىڭ) ناقتى تاپسىرىسى مەن جۇك بويىنشا كەلىسىمىنىڭ بولماۋى. وسىلايشا اۆتوكولىكتەردىڭ جارتىسىنان كوبى قىتايعا ءبىر رەتتىك كەلىسىمگە كەلۋ ۇمىتىمەن بارادى. بۇل تاسىمالداۋشىلار قىتايلىق تاراپتان جۇكسىز ورالىپ، قايتادان كەزەكتە قالادى»، - دەپ حابارلايدى مەملەكەتتىك كىرىستەر كوميتەتىنەن.

قازاقستاندىق تاراپ قازىرگە دەيىن «نۇر جولى» بەكەتىندەگى جاعدايدى تۇراقتاندىرۋ بويىنشا ق ح ر- مەن كەلىسىم اياسىندا ءبىرقاتار شارا قابىلداپ جاتىر.