پۋلمونولوگ زاعريپا ابديەۆا: جۇقپالى دەرتتىڭ بەلگىلەرى بايقالسا، ءوز بەتىڭىزشە ەمدەلمەڭىز

وسكەمەن. قازاقپارات - شىعىس قازاقستان وبلىسىندا ۆيرۋس جۇقتىرعاندار سانى كۇننەن كۇنگە ارتۋدا.

وسى ورايدا ءوڭىردىڭ تۇكپىر-تۇكپىرىندە ناۋقاستاردى قابىلدايتىن جاڭا ستاتسيونارلار اشىلىپ جاتىر. كەلەسى اپتادا وسكەمەن قالاسىندا 50 ورىندىق گوسپيتال جۇمىسىن باستاماق. بۇل جايلى قازاقپارات تىلشىسىنە ش ق و باس پۋلمونولوگ دارىگەرى زاعريپا ابديەۆا ايتىپ بەردى.

«قازىر وكىنىشكە قاراي، وڭىرىمىزدە كوروناۆيرۋس جۇقتىرعاندار سانى ارتىپ كەلەدى. وسكەمەن قالاسىنداعى اباي جانە شاكارىم داڭعىلدارىنداعى ستاتسيونارلار %80-90 عا تولعان. سوندىقتان دۇيسەنبىدەن باستاپ وبلىستىق اۋرۋحانادا COVID-19 ينفەكتسياسىنا شالدىققانداردى ەمدەيتىن جاڭا گوسپيتال اشىلادى. بارلىق قاجەتتى جابدىقتارمەن قامتاماسىز ەتىلگەن سول مەديتسينالىق مەكەمەدە 50 ناۋقاستى قابىلداي الامىز»، - دەيدى زاعريپا ابديەۆا.

ونىڭ ايتۋىنشا، ەشقانداي سيمپتوم بايقالماعان نەمەسە جەڭىل فورمادا اۋىرعان پاتسيەنتتەر ءۇي كارانتينىنە وقشاۋلانۋدا. ال ورتاشا جانە اۋىر دەڭگەيدەگى ناۋقاستار ستاتسيونارلارعا جاتقىزىلۋدا.

«ايماق حالقىن سابىر ساقتاپ، دۇربەلەڭگە سالىنباۋعا شاقىرامىن. ەگەر سىزدە جۇقپالى دەرتتىڭ قانداي دا ءبىر بەلگىلەرى بايقالسا ءوز بەتىڭىزبەن ەمدەلۋ جولدارىن ىزدەمەي، مەكەنجايىڭىز بويىنشا وتباسىلىق امبۋلاتورياعا حابارلاسىڭىز. ءار امبۋلاتوريادا ارنايى ماماندار ازىرلەنگەن. ولار ۇيىڭىزگە كەلىپ، سىزدەن COVID-19 عا سىناما الىپ، ۇدايى باقىلاۋ جۇرگىزەدى. ەگەر ۆيرۋس انىقتالىپ جاتسا، ءتيىستى شارالار قابىلدانادى»، - دەيدى ول.

ءوڭىردىڭ باس پۋلمونولوگ دارىگەرى تۇرعىندارعا كارانتين شەكتەۋلەرىن قاتاڭ ساقتاۋ قاجەتتىگىن ەسكەرتتى.

«دالاعا شىققاندا مىندەتتى تۇرلە ماسكا تاعىپ، الەۋمەتتىك قاشىقتىقتى ساقتاڭىزدار. ەگەر ءسىز نان الۋ ءۇشىن ءبىر دۇكەنگە كىرگەندە كەزەكتە ماسكا كيمەگەن بىرەۋ تۇرسا، شىعىپ كەتىڭىز. ەڭ باستىسى دەنساۋلىق قوي، ال ناندى باسقا جەردەن دە الۋعا بولادى. اس بەرىپ، توي-تومالاق وتكىزۋدەن باس تارتىڭىزدار!» ، - دەيدى زاعريپا ابديەۆا.