نۇر- سۇلتاندا احۋال ورتالىعى اشىلدى

نۇر- سۇلتان. قازاقپارات - استانادا احۋال ورتالىعى اشىلدى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

«قالادا ەپيدەميولوگيالىق جاعدايدى ەسكەرە وتىرىپ، ءبىرقاتار شەشىم قابىلداندى. بىرىنشىدەن، جەدەل مەديتسينالىق كومەك بازاسىندا بايلانىس ورتالىعى قۇرىلدى. وندا دەرەۋ تالداۋ جاسالىپ، كەڭەس بەرىلەدى. بۇل - كۇنىنە شامامەن 500 ءوتىنىم. سونداي- اق قالالىق اۋماقتىق ەمحانالاردا جاۋاپتى تۇلعالارمەن بايلانىس ورتالىعى قۇرىلدى. ولار تۋرالى اقپارات ينتەرنەت- رەسۋرستاردا قولجەتىمدى. قالامىزداعى iKOMEK اقپارات ورتالىعىندا مەديتسينالىق ۇيىمداردىڭ ءار باسشىسىنا ارنالعان موبيلدى قوسىمشا بار. وتىنىمدەر بىردەن ولاردىڭ ءموبيلدى قوسىمشاسىنا تۇسەدى»، - دەپ ءتۇسىندىردى قوعامدىق دەنساۋلىق ساقتاۋ باسقارماسىنىڭ باستىعى ساۋلە قيسىقوۆا.

⠀ ساۋلە قيسىقوۆا ەلوردادا احۋال ورتالىعى قۇرىلىپ، وندا قالانىڭ توسەك- ورىن قورى ك ۆ ي جانە ناۋقاستار اعىمىمەن رەتتەلەتىنىن اتاپ ءوتتى. «جوسپارلى امبۋلاتوريالىق- ەمحاناعا بارۋدى ۋاقىتشا توقتاتۋ ەسەبىنەن بۇل كادرلىق رەسۋرستار قوسىمشا جەدەل مەديتسينالىق جاردەم بريگادالارىن قۇرۋعا باعىتتالدى. جاقىندا 32 بريگادا قۇرىلدى. بۇگىندە قالادا 150 بريگادا جۇمىس جاساۋدا»، - دەدى ول.