ەلوردادا جەدەل جاردەمگە قوسىمشا ءوتىنىم بەرۋ ارناسى ىسكە قوسىلدى

نۇر- سۇلتان. قازاقپارات - ەلوردادا جەدەل جاردەمگە قوسىمشا ءوتىنىم بەرۋ ارناسى ىسكە قوسىلدى، دەپ حابارلايدى قازاقپارات ءتىلشىسى.

«جەدەل جاردەم كولل- ورتالىعىنا بايلانىس جۇكتەمەسىنىڭ جوعارىلاۋىن ەسكەرە وتىرىپ، قوسىمشا ءوتىنىم بەرۋ ارناسى ىسكە قوسىلدى - بۇل bot @ns103bot. بوتتى پايدالانىپ، جەدەل جاردەم شاقىرتا الاسىز. بوتتىڭ بارلىق سۇراقتارىنا جاۋاپ بەرە وتىرىپ، ءوزىڭىزدىڭ ج س ن، سونىمەن بىرگە تۇرعىلىقتى مەكەنجايىڭىزدى كورسەتە وتىرىپ، ءسىزدىڭ ءوتىنىشىڭىز قابىلداۋ ءبولىمىنىڭ ديسپەتچەرىنە جىبەرىلەدى»، - دەپ جازدى ەلوردا اكىمىنىڭ ورىنباسارى ماليكا بەكتۇروۆا ءوزىنىڭ Telegram ارناسىندا.

ءارى قاراي قوڭىراۋ شۇعىلدىق ساناتى بويىنشا قازاقستان رەسپۋبليكاسى دەنساۋلىق ساقتاۋ مينيسترلىگىنىڭ № 450 بۇيرىعىنا سايكەس انىقتالادى.

جەدەلدىك ساناتىن تاعايىنداعاننان كەيىن، ءوتىنىم ديسپەتچەردىڭ شاقىرۋ كەزەگىنە تۇسەدى، ول وسى شاقىرۋعا بريگادانى تاعايىندايدى. جالعان مالىمەتتەر بولعان جاعدايدا ءوتىنىم قابىلدانبايدى. بۇدان بۇرىن حابارلانعانداي، نۇر- سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ەلوردادا جەدەل جاردەم قىزمەتىنە جۇكتەمە ارتقانىن ءمالىم ەتتى.

اۆتور: رۋسلان عابباسوۆ