پاندەميا كەزەڭىندە بيوتەحنولوگيا سالاسىنداعى عىلىمي زەرتتەۋلەر ءۇش ەسە ارتتى
دەپ حابارلايدى قازاقپارات Energyprom.kz مونيتورينگ اگەنتتىگىنىڭ سايتىنا سىلتەمە جاساپ.
2020 -جىلدىڭ ءبىرىنشى توقسانىندا عىلىمي زەرتتەۋلەر مەن ازىرلەمەلەر سالاسىنداعى قىزمەتتەر 19,1 ميلليارد تەڭگەنى قۇرادى، بۇل وتكەن جىلمەن (%91,2) سالىستىرعاندا % 6,9- عا از. بارلىق كورسەتىلگەن قىزمەتتىڭ % 62,3- ى الماتىعا تيەسىلى، بۇل - 11,9 ميلليارد تەڭگەنى قۇرادى. اتالعان كورسەتكىش وتكەن جىلمەن بىردەي. % 12,5- ى شىعىس قازاقستان وبلىسىنا ال % 9,9- ى نۇر- سۇلتان قالاسىنا تيەسىلى.
وسى سالاداعى بارلىق قىزمەتتىڭ % 86,4- ىن قۇرايتىن جاراتىلىستانۋ جانە ينجەنەريا سالاسىندا ەڭ كوپ قاراجات گەولوگيالىق سالاداعى عىلىمي- زەرتتەۋ، تاجىريبەلىك- ادىستەمەلىك جانە تاجىريبەلىك- كونسترۋكتورلىق جۇمىستارعا 1,1 ميلليارد تەڭگە ءبولىندى. 1,1 ميلليارد تەڭگە بيوتەحنولوگيا سالاسىنداعى عىلىمي- زەرتتەۋ جانە تاجىريبەلىك- كونسترۋكتورلىق جۇمىستارعا جۇمسالدى. مۇندا ينۆەستيتسيالاردىڭ قارقىندى ءوسۋى بايقالادى. قىزمەت كورسەتۋ كولەمى وتكەن جىلدىڭ ءبىرىنشى توقسانىنا قاراعاندا 3,3 ەسەگە ءوستى.
ءبىلىم جانە عىلىم ءمينيسترى اسحات ايماعامبەتوۆ COVID-19-عا قارسى قازاقستاندىق ۆاكسينا 2020 -جىلعى قىركۇيەكتە كلينيكالىق سىناققا الىنۋى مۇمكىن ەكەنىن مالىمدەدى. ءمينيستردىڭ ايتۋىنشا، قازاقستاندا بيولوگيالىق قاۋىپسىزدىك جانە بيوتەحنولوگيا سالاسىندا جۇيەلى تۇردە عىلىمي زەرتتەۋلەر جۇرگىزىلەدى. اتالعان سالادا 12 عىلىمي ۇيىم، 2,5 مىڭعا جۋىق ادام جۇمىس ىستەيدى.
بۇگىنگى تاڭدا ەلىمىزدىڭ 19 جوعارى وقۋ ورنىندا وسى سالانىڭ 4 مىڭعا جۋىق بولاشاق مامانى ءبىلىم الۋدا. ۇلتتىق بيوتەحنولوگيا ورتالىعى - بيولوگيالىق بەيىندەگى ءىرى عىلىمي ۇيىمداردىڭ ءبىرى. ورتالىق 25 سەرتيفيكاتتالعان عىلىمي زەرتحانادان تۇرادى. مۇندا دەنساۋلىق ساقتاۋ مينيسترلىگىنىڭ تاپسىرىسى بويىنشا كوروناۆيرۋستى دياگنوستيكالاۋ ءۇشىن 11 مىڭ پ ت ر تەست- جۇيەسى ازىرلەنگەن.
بۇعان دەيىن ءبىلىم جانە عىلىم مينيسترلىگى حابارلاعانداي، جامبىل وبلىسىندا كوروناۆيرۋسقا قارسى ۆاكسينا شىعارادى. ۆاكسينا شىعاراتىن بيوفارماتسيەۆتيكالىق زاۋىت ءتيىستى وندىرىستىك تاجىريبەنىڭ (GMP) حالىقارالىق ستاندارتى بويىنشا يممۋنوبيولوگيالىق ءدارى- دارمەكتەر، ونىڭ ىشىندە كوروناۆيرۋس ينفەكسياسىنا قارسى ۆاكسينا شىعاراتىن بولادى. سونداي- اق كاسىپورىندا پاندەميالىق تۇماۋعا، تۋبەركۋلەزگە، برۋتسەللەزگە، نودۋليارلىق دەرماتيتكە، ۇساق كۇيىس قايىراتىن جانۋارلار وباسىنا، قوي مەن ەشكىنىڭ كونتاگيوزدى ەكتيماسىنا، قوي شەشەگىنە، قۇتىرماعا جانە باسقا دا جۇقپالى اۋرۋلارعا قارسى ۆاكسينالار شىعارىلادى. قۇرىلىس جۇمىستارىن بيىل جەلتوقسان ايىندا اياقتاۋدى جوسپارلاپ وتىر. جىل سايىن بيوفارماتسيەۆتيكالىق پرەپاراتتاردىڭ 60 ميلليون دوزاسىنا دەيىن ءوندىرۋ كوزدەلگەن.
