ساۋلە قيسىقوۆا قالادا پنيەۆمونياعا شالدىققاندار تۋرالى مالىمەت بەردى

نۇر-سۇلتان. قازاقپارات - نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا قالادا پنيەۆمونياعا شالدىققاندار تۋرالى ايتىپ بەردى، دەپ حابارلايدى قازاقپارات ءتىلشىسى.

«كۇنىنە كوروناۆيرۋس ينفەكتسياسى جانە پنيەۆمونيامەن 350-400 گە جۋىق ادام اۋرۋحاناعا جاتقىزىلادى. جۇقپالى اۋرۋلار جانە پروۆيزورلىق اۋرۋحانالاردا ادامداردىڭ سانى بۇگىندە 2,5 مىڭعا دەيىن ءوسىپ وتىر. ونىڭ 91 پايىزى ورتاشا اۋىرلىق دارەجەسىندە، 9 پايىزى اۋىر جانە وتە اۋىر. ولار جەدەل رەانيماتسيا بولىمىنە بىردەن تۇسەدى. نەگىزى، سوڭعى اپتامەن سالىستىرعاندا، ناۋقاستاردىڭ سانى ءۇش ەسەگە دەيىن ءوستى»، - دەدى ول.

ونىڭ سوزىنە قاراعاندا، وسى تاۋلىكتە رەانيماتسيا بولىمىندە 103 ادام جاتىر، ونىڭ 51 ءى كوروناۆيرۋس ينفەكتسياسى بولسا، سونىڭ ىشىندە 22 ادام جاساندى تىنىس الۋ اپپاراتىنا قوسىلعان. وكىنىشكە قاراي، بۇگىندە 38 ءولىم جاعدايى تىركەلدى. ولاردىڭ 70 پايىزى - 60 جاستان اسقان ادامدار.

«پنيەۆمونيامەن اۋىراتىن ناۋقاستاردىڭ سانى تاۋلىگىنە 600 جاعدايعا دەيىن ءوستى. بۇرىن 80 جاعدايعا دەيىن بولاتىن. اپتاسىنا 8,5 ەسەگە دەيىن جوعارىلاۋى بايقالىپ وتىر. 12- ماۋسىمنان باستاپ، نۇر-سۇلتان قالاسىنداعى مەديتسينالىق ۇيىمداردىڭ توسەك ورنى قورىن قايتا قۇرۋعا بايلانىستى جۇقپالى جانە پروۆيزورلىق اۋرۋحانالارداعى توسەك ورنى سانى 1351 ورىنعا ۇلعايتىلدى. تەك سوڭعى ءۇش كۇندە قوسىمشا 830 توسەك دايىندالدى. ونىڭ ىشىندە بۇگىن ۇلتتىق عىلىمي مەديتسينالىق ورتالىقتىڭ بازاسىندا تاعى 200 ينفەكتسيالىق توسەك دايىندالادى. سونىمەن، بۇگىندە كوروناۆيرۋس ينفەكتسياسىمەن كۇرەسۋگە 3135 توسەك ورىندىق 12 دەنساۋلىق ساقتاۋ ۇيىمى جۇمىلدىرىلدى. قازىرگى ۋاقىتتا جۇقپالى جانە پروۆيزورلىق اۋرۋحانالاردا جۇمىس جۇكتەمەسى 79 پايىزدى قۇراپ وتىر»، - دەدى باسقارما باسشىسى.