قىرعىزستان پرەزيدەنتى ماسكەۋگە بارىپ تۇرىپ جەڭىس پارادىنا قاتىسپادى

نۇر-سۇلتان. قازاقپارات- قىرعىزستان پرەزيدەنتى سوورونباي جەەنبەكوۆ ماسكەۋگە بارىپ تۇرىپ جەڭىس پارادىنا قاتىسپادى.

ويتكەنى قىرعىز دەلەگاتسياسىنىڭ ەكى مۇشەسىنىڭ COVID-19 جۇقتىرعانى انىقتالدى. قىرعىزستان پرەزيدەنتى ماسكەۋدەن ورالعاننان كەيىن وقشاۋلاناتىن بولدى. بۇل تۋرالى ر ي ا نوۆوستي قىرعىزستان پرەزيدەنتىنىڭ باسپا ءسوز قىزمەتىنە سىلتەمە جاساپ حابارلادى.

الگوريتمگە سايكەس پرەزيدەنت، دەلەگاتسيا مۇشەلەرى جانە ولارمەن بىرگە جۇرەتىن ادامدار ماسكەۋگە جەتكەندە كوروناۆيرۋسقا تەست تاپسىرعان. ناتيجەسىندە پرەزيدەنت اپپاراتىنىڭ سىرتقى ساياسات ءبولىمىنىڭ باستىعى دانيار سىدىقوۆ پەن ءبىر قاۋىپسىزدىك قىزمەتكەرىنىڭ تەستى وڭ ناتيجە كورسەتتى. ودان سوڭ قىرعىزستان پرەزيدەنتى ماسكەۋدە ءوتىپ جاتقان ۇلى جەڭىستىڭ 75 جىلدىعىنا ارنالعان ءىس- شارالارعا قاتىسۋدان باس تارتۋ تۋرالى شەشىم قابىلدادى.

www.24.kz