اقتوبەدە ءدارىحانالاردىڭ الدىندا ۇزىن-سونار كەزەك پايدا بولدى

اقتوبە. قازاقپارات - اقتوبەلىكتەر قىزۋدى تۇسىرەتىن، جەدەل رەسپيراتورلىق ۆيرۋستىق ينفەكسياعا قارسى ءدارىنى جاپپاي ساتىپ الىپ جاتىر.

وبلىستىڭ باس سانيتار دارىگەرى ءدارى- دارمەك تاپشىلىعى تۋرالى ايتىپ بەردى، دەپ حابارلايدى قازاقپارات ءتىلشىسى.

اقتوبە وبلىسى بويىندا 671 ادام كوروناۆيرۋس ينفەكسياسىنا شالدىققان بولسا، تاعى 389 سيمپتومسىز جاعداي تىركەلدى. ءوسىم - 7,3 پايىز. 357 ناۋقاس جازىلىپ شىقتى. ءۇي كارانتينىندە 2343 ادام جاتىر. ءبارى مەديتسينالىق باقىلاۋ الىنعان. قازىر كوپشىلىك ءدارى-دارمەكتى جاپپاي ساتىپ الۋعا كوشكەن. قاراپايىم قىزۋ تۇسىرەتىن دارىلەر ءدارىحانادا تاپشى.

«اقتوبە وبلىسىندا 600 دەن استام ءدارىحانا، 15 قويما بار. وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتى باقىلاۋ جۇرگىزىپ وتىر. انتيبيوتيك پەن قىزۋ تۇسىرەتىن ءدارى- دارمەكتىڭ ءدارىحانادا ازايعانى بايقالادى، ءبىراق قويمادا جەتكىلىكتى. تۇرعىنداردىڭ قورقىپ، جاپپاي ساتىپ الىپ جاتقانى راس. ايتارىمىز - ادامدار ءوز بەتىمەن ەمدەلمەۋى كەرەك. ەنتىگىپ، قىزۋى كوتەرىلىپ، قاتتى جوتەلسە دارىگەر شاقىرعان ءجون»، - دەدى وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى نۇرسۇلۋ بەركىمبايەۆا.

ايتا كەتەيىك، وڭىردە وتكەن تۇندە وكپەنىڭ قابىنۋى دەرتىنەن 4 ادام كوز جۇمدى. ونىڭ ناقتى دياگنوزى ايدىڭ سوڭىندا انىقتالادى. قازىر 10 ادام جاساندى تىنىس الۋ اپپاراتىنا قوسىلعان.