كوروناۆيرۋس جۇقتىرعان ادامعا جەدەل جاردەم قانداي كومەك كورسەتە الادى؟
بۇل تۋرالى ۇلتتىق شۇعىل مەديتسينانى ۇيلەستىرۋ ورتالىعى باسقارما ءتوراعاسىنىڭ مىندەتىن اتقارۋشى باۋىرجان ءجۇسىپوۆ ايتتى، دەپ حابارلايدى قازاقپارات ءتىلشىسى.
«كوروناۆيرۋستىق ينفەكتسيانى دياگنوستيكالاۋ جانە ەمدەۋدىڭ كلينيكالىق حاتتاماسىنا سايكەس، پاتسيەنتتەرگە جەدەل كومەك كورسەتۋ الگوريتمى بەكىتىلگەنىن اتاپ ءوتۋ كەرەك. وسىلايشا جەدەل كومەك بريگاداسى شاقىرتۋعا قىزمەت كورسەتۋ كەزىندە ءبىرىنشى كەزەكتە پاتسيەنتتىڭ جالپى جاي-كۇيى، ەنتىگۋىنىڭ بار بولۋى، مينۋتىنا تىنىس الۋ جيىلىگى، دەنە قىزۋى جانە قانىنىڭ وتتەگىمەن قانىعۋى باعالانادى. جانە دە وسى كورسەتكىشتەرگە بايلانىستى ودان كەيىنگى ءادىس انىقتالادى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، اۋرۋدىڭ جەڭىل اعىمى انىقتالعان جاعدايدا ەنتىگۋ جانە قاۋىپ فاكتورلارى جوق پاتسيەنت ۇيدە قالدىرىلادى. ارى قاراي ەمحانانىڭ ۋچاسكەلىك دارىگەرىنىڭ قاداعالاۋىنا جىبەرىلەدى.
«ەگەر پاتسيەنتتە اۋىر نەمەسە ورتاشا اۋىر اعىمى، سونداي-اق قاۋىپ فاكتورى بار، ياعني جاسى 60 تان اسقان، قانت ديابەتى، وكپەنىڭ سوزىلمالى اۋرۋلارى سياقتى اۋرۋلار بولعان كەزدە ودان ارى ەمدەۋ ءۇشىن ستاتسيونارعا جەتكىزىلەدى. جالپى، قازىرگى ۋاقىتتا جەدەل مەديتسينالىق كومەك بريگادالارىنىڭ بارلىق قىزمەتكەرلەرى كوروناۆيرۋستىق ينفەكتسيامەن اۋىراتىن ناۋقاستاردى انىقتاۋ الگوريتمىمەن وقىتىلعان. بارلىق قاجەتتى مەديتسينالىق جابدىقتارمەن، دارىلىك زاتتارمەن جانە قورعانۋ قۇرالدارىمەن جابدىقتالعان»، - دەدى باۋىرجان ءجۇسىپوۆ.
سونىمەن قاتار، ول جەدەل كومەك ستانسالارىنىڭ جانىنا ارنايى call-ورتالىقتار قۇرىلعانىن، وندا مەديتسينالىق كومەك كورسەتۋ ماسەلەرى بويىنشا بىلىكتى ماماندار كەڭەس بەرىپ جاتقانىن ايتتى.
«مۇنان بولەك، پرەزيدەنتتىڭ تاپسىرماسىن ورىنداۋ ماقساتىندا كوروناۆيرۋسپەن كۇرەس اياسىندا ەپيدەمياعا قارسى شارالاردى جۇرگىزۋگە تارتىلعان مەديتسينا قىزمەتكەرلەرىن ىنتالاندىرۋ جانە قولداۋ ءۇشىن جەدەل مەديتسينالىق كومەك قىزمەتكەرلەرىنە قوسىمشا تولەمدەر جۇزەگە اسىرىلادى. وسى جىلدىڭ مامىر ايىندا جەدەل مەديتسينالىق كومەكتىڭ 11823 قىزمەتكەرىنە 2 ميلليارد تەڭگەدەن استام قوسىمشا تولەماقى بەرىلدى.
