قازاقستاندىق اسكەريلەر رەسەيدە وتەتىن ارميا حالىقارالىق ويىندارىنا قاتىسادى

نۇر-سۇلتان. قازاقپارات - «ءماتىبۇلاق» وقۋ ورتالىعىنىڭ بازاسىندا ءتورت اي كولەمىندە رەسەي فەدەراتسياسىندا ماسكەۋ ماڭىنداعى «الابينو» پوليگونىندا وتەتىن«تانك بياتلونى» بايقاۋىنا دايىندىق ءجۇرىپ جاتىر.

بۇل تۋرالى قازاقپارات ق م باسپا ءسوز قىزمەتىنە سىلتەمە جاساپ حابارلايدى.

وسى جىلدىڭ اقپان ايىندا سەگىز تانك ەكيپاجى ىرىكتەۋگە كىرىسكەن بولاتىن. قازىرگى ۋاقىتتا ءۇش ىرىكتەۋ كەزەڭىنەن كەيىن كوماندا قۇرامىنا كىرۋگە ۇمىتكەر بەس ەكيپاج قالدى. سايىس تالاپتارىنا سايكەس «تانك بياتلونىنا» قاتىسۋ ءۇشىن ءتورت ەكيپاج قاجەت.

«قازىر تانك ماماندارى قازاقستان قارۋلى كۇشتەرىنىڭ قۇراماسىنا كىرۋگە ارەكەت ەتىپ، ودان كەيىن سايىستا حالىقارالىق دەڭگەيدە جەڭۋ ماقساتىن قويادى. ءبىزدىڭ قاتىسۋشىلارعا ماتەريالدىق ءبولىمدى ءبىلۋ، بىلىكتىلىك پەن كاسىپقويلىق، فيزيكالىق شىدامدىلىقتى كورسەتۋ سىندى تالاپتار قويىلادى. جۇلدەلى ورىندار ءۇشىن كۇرەس قاجىرلى ەڭبەك پەن جەكە قۇرامدى دايىنداۋدى، ۇزدىك بولۋعا ۇمتىلۋدى تالاپ ەتەدى»، - دەيدى «استانا» وڭىرلىك قولباسشىلىعى اسكەرلەرى قولباسشىسىنىڭ ورىنباسارى پولكوۆنيك يۋري اسقاروۆ.

تانك بياتلونى ارميالىق حالىقارالىق ويىنداردىڭ نەگىزى بولىپ سانالادى. 2013-جىلدان باستاپ بۇل بايقاۋ ءوز بەتىنشە وتكىزىلدى. اسكەري حالىقارالىق ويىندار 2015-جىلى باستالىپ، «تانك بياتلونى» بايقاۋى نەگىزگى جارىس رەتىندە كىردى.

قازاقستان كومانداسى «تانك بياتلونى» بايقاۋىنا جەتى رەت قاتىستى. 2013-جىلى قازاقستاندىق تانك ماماندارى كومانداسى ەكىنشى ورىنعا يە بولدى. ودان كەيىن ءۇشىنشى جانە ءتورتىنشى ورىنداردى مىسە تۇتتى.

2017- جانە 2018-جىلدارى قازاقستان قۇراماسى تاعى دا ەكىنشى ورىنعا تۇراقتادى.

«مەن اسكەري ينستيتۋتتىڭ كۋرسانتى بولعان كەزدە تانك بياتلونىنا قاتىسۋدى ارماندادىم. قازىرگى تاڭدا ىرىكتەۋدىڭ العاشقى كەزەڭدەرىنەن ءوتتىم. قازاقستان قۇراماسىنىڭ نەگىزگى قۇرامىنا كىرىپ، ەلىمىزدىڭ ابىرويىن اسقاقتاتىپ، قۇرمەتتى ورىنعا يە بولامىن دەپ ۇمىتتەنەمىن. ءبىز جەڭىسكە ۇمتىلامىز!»، - دەيدى دەسانتتىق-شابۋىلداۋشى اسكەرلەرى اسكەري ءبولىمىنىڭ تانك ۆزۆودىنىڭ كومانديرى لەيتەنانت سەيتجان قوبلان ۇلى.

سايىسقا قاتىسۋشىلاردى ىرىكتەۋ جانە دايىنداۋ جۇمىستارىنا تۇزەتۋلەر كوروناۆيرۋستىق ينفەكتسيا پاندەمياسى مەن ەلدەگى جاريالانعان توتەنشە جاعداي ەنگىزىلۋىنە بايلانىستى كەيىنگە قالدىرىلعان بولاتىن. تانك ماماندارى مەن جاتتىقتىرۋشىلار قۇرامىن ىرىكتەۋدىڭ ءبىرىنشى جانە ەكىنشى كەزەڭدەرى اراسىندا جوسپارلانعان ءۇزىلىستى پوليگوندا وتكىزۋگە تۋرا كەلدى، ويتكەنى كارانتين كەزەڭىندە ەلىمىز بويىنشا قوزعالىسقا جول بەرمەدى.

«ءبىز جارىس كەزەڭدەرى اراسىندا ۇيگە بارماي، پوليگوندا جاتتىعۋلاردى جالعاستىرعانىمىزعا تۇسىنىستىكپەن قارادىق. كوماندا قۇرامىنداعى ءبىر اسكەري قىزمەتشى اۋىرماۋى كەرەك بولدى، ايتپەسە تۇتاس كوماندا بولا المايدى. ءبىزدىڭ جاقىندارىمىز بەن وتباسىمىز تۇسىنىستىكپەن قارايدى»، - دەيدى «شىعىس» وڭىرلىك قولباسشىلىعىنىڭ اسكەري قىزمەتشىسى اعا سەرجانت دميتري الكەنوۆ كوروناۆيرۋستى جۇقتىرۋدىڭ الدىن الۋ ماقساتىندا «تانك بياتلونى» بايقاۋىنا ىرىكتەۋ قاتىسۋشىلارى باسقا اسكەري قىزمەتشىلەردەن بولەك جاتتىعادى.

بارلىق ساقتىق شارالارى ساقتالىپ، ولاردىڭ دەنساۋلىق جاعدايىنا باقىلاۋ جۇرگىزىلەدى.