ءدارىحانادان ءدارى ىزدەپ، داۋرىعۋدىڭ قاجەتى جوق - الماتىنىڭ باس دارىگەرى

الماتى. قازاقپارات - الماتىنىڭ باس دارىگەرى كامالجان نادىروۆ قالالىقتاردى ءوزىن-ءوزى ەمدەمەۋگە جانە ءدارىحاناعا بارماۋعا شاقىردى، دەپ حابارلايدى قازاقپارات ءتىلشىسى.

«قازىر ءبىز الەۋمەتتىك جەلىلەرگە مونيتورينگ جۇرگىزىپ وتىرمىز. وندا ءدارىحانالاردا ءدارى تاپشىلىعى تۋرالى كوپ جازىلىپ جاتىر. اسىرەسە، ۆيرۋسقا قارسى پرەپاراتتار جوق دەيدى. مەن سىزدەردى مۇنداي جالعان اقپاراتتارعا سەنبەۋگە شاقىرامىن. پروفيلاكتيكا ءۇشىن ءدارى ىشۋگە بولمايدى. ول اۋرۋدىڭ الدىن المايتىنىن ەسكەرتكىم كەلەدى»، - دەدى كامالجان نادىروۆ.

سونىمەن قاتار، ول ەمدى دارىگەردىڭ كەڭەسىمەن جۇرگىزۋ كەرەكتىگىن باسا ايتتى. ايتپەسە، ودان ناتيجە شىقپايدى نەمەسە ومىرىڭىزگە قاۋىپ تونەدى.

«سوندىقتان مەن الماتىلىقتاردى بەكەر داۋرىعىپ، ءدارى ساتىپ الۋ ءۇشىن ءدارىحاناعا جۇگىرمەۋگە شاقىرامىن. دارىلەردى دۇرىس قولدانباسا، ونىڭ قارسى كورسەتكىشتەرى بارىن ۇمىتپاۋ كەرەك. سوندىقتان وتە مۇقيات بولعان ابزال»، - دەدى ول.