پوليتسيا قىزمەتكەرى ءۇشىن ۇستامدى بولۋ، ازاماتتارمەن ءتىل تابىسا ءبىلۋ دە اسا قاجەت - باقىتجان اسقاروۆ
جۇمىس بارىسىندا كوبىنە كۇزەتىلەتىن تۇلعالارعا جول باستاپ جۇرەتىن ازامات ۋاقىتپەن ساناسپاي قىزمەت ەتۋدە، دەپ حابارلايدى قازاقپارات ءتىلشىسى.
قوناقتاردىڭ اراسىندا قاۋىپسىزدىگى ارنايى زاڭمەن بەكىتىلگەن تۇلعالار مەن شەتەلدەن كەلەتىن تۋريستەر دە بار. قيىن دا ءارى جاۋاپتى جۇمىستى اتقارۋ بارىسىندا پوليتسەي ارىپتەسى قايرات الىبەكوۆ ەكەۋى كولىك جۇرگىزەدى. ولار قوناقتاردى مەجەلى جەرگە جەتكەنشە جوعارى جىلدامدىقتى تۇسىرۋگە جانە توقتاۋعا بولمايدى.
«جاۋاپتى جۇمىستى ابىرويمەن اتقارۋ ءبىز ءۇشىن ۇلكەن مىندەت. سوندىقتان بار كۇش- جىگەرىمىزدى جۇمسايمىز. كۇزەتىلەتىن تۇلعالاردىڭ جولداعى قاۋىپسىزدىگىن ساقتاپ، كەپتەلىستەرگە كەزىكپەي تەز ارادا مەجەلى جەرگە جەتكىزۋگە تىرىسامىز. جولدا جۇرگەن سوڭ، ءارتۇرلى وقيعالارعا كەزدەسەمىز. قيىندىقتاردى قىزىقتى ءجايتتار جەڭىپ كەتەدى»، - دەيدى پوليتسيا اعا لەيتەنانتى. باقىتجان اسقاروۆ ارىپتەسىمەن بىرگە تاڭەرتەڭنەن كەشكە دەيىن كولىكتە جۇرەدى. سوندىقتان ىشەر استى دا كولىككە سالىپ الادى. سەبەبى، توقتاپ تۇستەنۋگە، كەشكى استى جايباراقات جەۋگە مۇمكىندىك جوق. جۇمىس سولاي. ۋاقىتقا باعىنبايدى. تۇسكى مەزگىلدە، كەشكى اس ۋاقىتىندا جولدا بولۋى عاجاپ ەمەس.
«ەلباسىمەن، پرەمەر-مينيسترمەن جانە وزگە دە مينيسترلەرمەن بىرگە جۇردىك. شەتەلدىك قوناقتاردىڭ قاسىندا جۇرەمىز. جولدا ءاردايىم ۇلكەن جىلدامدىقپەن جۇرەمىز. وقىستان كولىك شىعىپ قالاتىن كەزدەر كوپ بولادى. وتكەن جىلى ارىس قالاسىندا توتەنشە جاعداي بولعان تۇستا دەرەۋ جولعا شىقتىق. باسشىلاردىڭ كولىگىنىڭ الدىندا ءبىز ءجۇرىپ وتىردىق. قيىلىستىڭ بىرىندە جيگۋلي كولىگى ەشقانداي بەلگى بەرمەستەن وقىستان سولعا بۇرىلىپ قالدى. سوعىسۋعا ءسال-اق قالدىق. تاجىريبەنىڭ ارقاسىندا كولىك اپاتىنا جول بەرمەدىك. سوڭىمىزدان كەلە جاتقان باسشىلاردا بىردەن توقتاپ، جاعدايىمىزدى ءبىلدى. دەرەۋ كولىكتى وتالدىرىپ، جۇمىسىمىزدى جالعاستىردىق»، - دەيدى ب. اسقاروۆ.
بۇگىندە باقىتجان جۇماباي ۇلىنىڭ قىزمەت بابىندا قول جەتكىزگەن ماراپاتتارى كوپ. مينيسترلىكتەن، وبلىس اكىمىنەن العان العىس حاتتارى بار. ودان بولەك مەملەكەتتىك مەدالعا دا يە بولعان. وتباسىندا جۇبايى جانارمەن ءۇش قىز، ەكى ۇل تاربيەلەپ، ءوسىرىپ وتىر. قازىر ەكى نەمەرەسى بار. ۇلى ماقسات ونىڭ جولىن قۋىپ، تۇركىستانداعى پاترۋلدىك پوليتسيادا قىزمەت اتقارۋدا.
ال، كەلىنى گۇلناز شىمكەنت قالاسىنداعى پاترۋلدىك بولىمدە ەڭبەك ەتۋدە. ەكەۋى دە الماتىداعى اكادەميادا جوعارى ءبىلىم العان.
«پوليتسيا قىزمەتكەرى بولۋ ءۇشىن ءبىلىم دە، بىلىك تە، بىلەك تە كەرەك. سابىر، ءتوزىم جانە قاجىر- قايرات قاجەت. شاپشاڭدىق پەن جىلدامدىق، تەز شەشىم قابىلداپ، جىلدام ارەكەت ەتە ءبىلۋ قابىلەتى پوليتسەيگە قاجەتتى باستى قاسيەتتەردىڭ قاتارىندا. ۇستامدى بولۋ مەن ازاماتتارمەن ءتىل تابىسا ءبىلۋ، سىپايى بولۋ دا اسا ماڭىزدى. ۇيدە ۇل-قىزىما، جۇمىستا ارىپتەستەرىمە ءاردايىم بىلگەن كەڭەسىممەن ءبولىسىپ وتىرامىن»، - دەيدى اعا لەيتەنانت.
اۆتور: اينۇر اقبايەۆا
