ۇ ب ت-دان شىعارىلعان تۇلەكتەر قاڭتارداعى سەرتيفيكاتپەن وقۋعا تۇسە الادى

نۇر-سۇلتان. قازاقپارات - ۇ ب ت ەرەجەسىن بۇزىپ، بيىل تەست تاپسىرۋ مۇمكىندىگىنەن ايىرىلعان تۇلەكتەر قاڭتار ايىنداعى تەست سەرتيفيكاتىن پايدالانا الادى.

بۇل تۋرالى ق ر ۇلتتىق تەستىلەۋ ورتالىعى ءتۇسىندىردى، دەپ حابارلايدى قازاقپارات.

«دوستار، ەگەر ءسىز ۇ ب ت-نى 2020 -جىلدىڭ قاڭتارىندا تاپسىرىپ، شەكتى بالل جيناعان بولساڭىز، سول سەرتيفيكاتپەن ج و و-عا اقىلى نەگىزدە تۇسە الاسىز. ويتكەنى زاڭنىڭ كەرى كۇشى بولمايدى، ءتىپتى ماۋسىم ايىنداعى تەستىلەۋگە كىرمەسەڭىز نەمەسە ماۋسىمداعى ۇ ب ت ناتيجەڭىز جويىلعان بولسا دا، قاڭتار ايىنىڭ ۇ ب ت سەرتيفيكاتى جارامدى بولىپ قالا بەرەدى»، - دەيدى تەستىلەۋ ورتالىعى.

ايتا كەتەيىك، جوعارى وقۋ ورنىنا اقىلى نەگىزدە ءتۇسۋ ءۇشىن ۇ ب ت جىلىنا 4 رەت وتكىزىلەدى (قاڭتار، ناۋرىز، ماۋسىم جانە تامىز). بۇل رەتتە، وقۋعا تۇسۋشىلەر ءبىلىم گرانتى كونكۋرسىنا قاتىسۋ ءۇشىن ماۋسىم ايىندا وتەتىن ۇ ب ت-نى تاپسىرۋى قاجەت.

بيىل 21-ماۋسىم مەن 5-شىلدە ارالىعىندا ەلىمىزدىڭ بارلىق وڭىرىندە ۇلتتىق ءبىرىڭعاي تەستىلەۋ وتەدى. تەستىلەۋدىڭ العاشقى كۇنى 6186 ادام قاتىسىپ، 164 تالاپكەر ەرەجە بۇزدى جانە بيىل تەست تاپسىرۋ مۇمكىندىگىنەن ايىرىلدى. ال 22-ماۋسىمدا - تەستىلەۋدىڭ ەكىنشى كۇنى رەسپۋبليكا بويىنشا 9748 تالاپكەر قاتىسىپ، ونىڭ 261 ى اۋديتوريادان شىعارىلدى.

اۆتور: ايجان سەرىكجان قىزى