قوعامداعى تۇراقتىلىق پەن تىنىشتىق پوليتسيانىڭ ءمىنسىز قىزمەتىنە بايلانىستى - مەملەكەت باسشىسى

نۇر-سۇلتان. قازاقپارات - قوعامداعى تۇراقتىلىق پەن تىنىشتىق پوليتسيانىڭ ءمىنسىز قىزمەتىنە بايلانىستى.

بۇل تۋرالى «BIZ BIRGEMIZ» ونلاين فورۋمدا قازاقستان پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«مەن قۇقىق قورعاۋ ورگاندارىنىڭ دا ەڭبەگىن ەرەكشە اتاپ وتكىم كەلەدى. ەلدەگى ءتارتىپ ساقشىلارىنا اسا ماڭىزدى مىندەت جۇكتەلىپ وتىر. قوعامداعى تۇراقتىلىق پەن تىنىشتىق پوليتسيانىڭ ءمىنسىز قىزمەتىنە بايلانىستى. سىزدەر كۇردەلى توتەنشە جاعداي كەزەڭىنەن ابىرويمەن وتتىڭىزدەر. بۇگىندە كارانتين شارالارىنىڭ ساقتالۋىن قادالاعاپ، بەكەتتەردە قىزمەت ەتىپ كەلەسىزدەر. بۇل وڭاي جۇمىس ەمەس. ءتىپتى قوعام وكىلدەرى تاراپىنان سىنعا ۇشىراعان كەزدەرىڭىز دە بولدى. ارينە، كاسىبي تۇرعىدان بىلىكسىزدىك تانىتقان پوليتسيا قىزمەتكەرلەرى دە جوق ەمەس. وسىنداي جەكەلەگەن جاعدايدار بۇكىل قۇقىق قورعاۋ ورگاندارىنىڭ بەدەلىنە زيان كەلتىرەدى. دەگەنمەن، ءتارتىپ ساقشىلارىنىڭ باسىم بولىگى ادال قىزمەت ەتىپ جاتقان ازاماتتار. مۇنى ەشكىم جوققا شىعارا المايدى»، - دەدى قازاقستان پرەزيدەنتى.

وسى رەتتە مەملەكەت باسشىسى ىشكى ىستەر ورگاندارىنىڭ بارلىق قىزمەتكەرلەرىن كاسىبي مەرەكەلەرى - پوليتسيا كۇنىمەن شىن جۇرەكتەن قۇتتىقتادى. مەملەكەتتىك قىزمەتشىلەردىڭ جانە اق حالاتتى ابزال جانداردىڭ دا ءتول مەرەكەسى قۇتتى بولسىن دەگەن تىلەگىن جەتكىزدى.

«وتان الدىنداعى سەرتكە بەرىك بولعاندارىڭىز ءۇشىن بارشاڭىزعا العىس ايتامىن. سونداي-اق اسكەري قىزمەتكەرلەر، ەرىكتىلەر، مەملەكەتتىك قىزمەتشىلەر، قايىرىمدىلىق ۇيىمداردىڭ وكىلدەرى، جۋرناليستەر جانە باسقا دا بەلسەندى ازاماتتارىمىز زور قۇرمەتكە لايىق. سىزدەردىڭ ارقالارىڭىزدا كوروناۆيرۋسپەن كۇرەستىڭ كۇردەلى كەزەڭدەرىن ەڭسەرىپ كەلەمىز. بارشاعىزدى بەيبىت كۇننىڭ باتىرلار دەۋگە بولادى. ءبىز وزدەرىڭىزدى ماقتان تۇتامىز. قاجىرلى ەڭبەكتەرىڭىز ءۇشىن ريزاشىلىعىمدى بىلدىرەمىن»، - دەدى قاسىم-جومارت توقايەۆ.