كوروناۆيرۋس جۇقتىرعاندار نەگە ءيىس سەزە المايدى؟

نۇر-سۇلتان. قازاقپارات - قىتاي، يران جانە يتاليا عالىمدارى كلينيكالىق دەرەكتەردى نەگىزگە الا وتىرىپ، كوروناۆيرۋس جۇقتىرعان ادامنىڭ نەگە ءدام مەن ءيىس سەزۋ قابىلەتىنەن ايىرىلاتىنىن انىقتادى.

زەرتتەۋ ناتيجەسىن Science Alert باسىلىمى جاريالادى.

ادامعا تۇماۋ تيگەن كەزدە مۇرنى بىتەلىپ، سودان ءدام مەن ءيىس سەزەتىن رەتسەپتورلارعا مولەكۋلا جەتپەي قالادى.

انوسميا (ءدام سەزۋدىڭ جوعالۋى) سودان پايدا بولادى. الايدا COVID-19 جۇقتىرعان ناۋقاستىڭ مۇرنى بىتەلمەيدى، ءبىراق سوندا دا ءدام مەن ءيىس سەزبەي قالۋ سىندى بەلگىلەرى بولادى. مۇنىڭ سىرى نەدە ەكەنىن بىلمەك بولعان عالىمدار ينفەكتسيا جۇقتىرعان ناۋقاستاردىڭ مۇرنىن كومپيۋتەر توموگرافياسىنا تۇسىرگەن.

توموگرافيادان ناۋقاستاردىڭ ءدام سەزۋگە جاۋاپ بەرەتىن مۇرىن بولىگى ءىسىنىپ، شىرىشپەن قاباتتاسىپ بىتەلىپ قالاتىنى كورىنگەن.

ال مۇرىننىڭ قالعان بولىگى اشىق، سوندىقتان ادام تۇماۋداعى سياقتى اۋا جۇتا الماي قينالمايدى.

باسىندا COVID-19 ينفەكتسياسى ادامنىڭ ءدام مەن ءيىس سەزۋ نەيروندارىن جاراقاتتاپ، سودان ادام سەزىنۋدەن قالادى دەپ بولجام جاسالعان ەدى. الايدا اعزاعا تۇسكەن كوروناۆيرۋس مۇرىننىڭ شىرىشتى قاباتىن قابىندىراتىن ACE2 اقۋىزىن بولەتىنى بەلگىلى بولدى.

مۇنداي اقۋىزعا قارسى تۇرۋ ءۇشىن مۇرىننىڭ يممۋن جۇيەسى ءىسىنىپ، سەزىم نەيروندارىن بۇعاتتاپ تاستايدى.

ال اعزانىڭ يممۋن جۇيەسى كوروناۆيرۋستى جەڭگەن كەزدە ءىسىنۋ باسىلىپ، ادامنىڭ ءدام مەن ءيىس كەزۋ قابىلەتى قالپىنا كەلەدى.

Massaget.kz