شىمكەنتتە وكپەسىنە سۋىق ءتيىپ، جەدەل جاردەم شاقىرعان ناۋقاستار كۇرت كوبەيدى

شىمكەنت. قازاقپارات - شىمكەنتتە وكپەسىنە سۋىق ءتيىپ، جەدەل جاردەم شاقىرتقان ناۋقاستار سانى كۇرت كوبەيىپ كەتتى.

بۇل تۋرالى قالالىق دەنساۋلىق ساقتاۋ باسقارماسى مالىمەت تاراتتى، دەپ حابارلايدى قازاقپارات ءتىلشىسى.

دەنساۋلىق ساقتاۋ باسقارماسىنىڭ مالىمەتىنشە، قالاداعى ەپيدەميالوگيالىق قولايسىز جاعدايعا بايلانىستى جەدەل جاردەمگە تۇسەتىن قوڭىراۋلاردىڭ سانى وسكەن. بۇگىندە 103 قىزمەتىنە كۇنىنە ورتا ەسەپپەن 1800-2000 قوڭىراۋعا دەيىن كەلىپ تۇسەدى.

«شاقىرتۋلاردىڭ باسىم بولىگى – ج ر ۆ ي، پنيەۆمونيا سىندى ينفەكسيالىق اۋرۋلار. ج ر ۆ ي دياگنوزىمەن اۋرۋحاناعا جاتقىزۋ - 2 ەسە (2019 -جىلعى ماۋسىم - 124، 2020 -جىلعى ماۋسىم - 260)، پنيەۆمونيا دياگنوزىمەن - 7,2 ەسە (2019 -جىلعى ماۋسىم-18، 2020 -جىلعى ماۋسىم -130) وسكەن. ينفەكسيالىق اۋرۋلاردىڭ ارتۋىنا بايلانىستى قالادا 1420 توسەك-ورىن اشىلدى. ونىڭ ىشىندە 690 ورىن ينفەكسيالىق، 290-كارانتيندىك، 440-پروۆيزورلىق توسەك-ورىن اشىلعان. وسىنىڭ ەسەبىنەن ورىن جەتىسپەۋ پروبلەماسى رەتتەلمەك. سونداي-اق، 22 وكپەنى جاساندى جەلدەتۋ جانە 38 مونيتور اپپاراتى قوسىمشا ورناتىلعان. بۇعان قوسا، 27-ماۋسىمعا دەيىن 40 وكپەنى جاساندى جەلدەتۋ اپپاراتى ورناتىلادى دەپ جوسپارلانۋدا» دەلىنگەن حابارلامادا.

باسقارمانىڭ مالىمەتىنشە، ناۋقاستاردىڭ اۋرۋ جۇقتىر كورسەتكىشىنىڭ ارتۋىنا ساقتىق شارالارىنىڭ ءتيىستى دەڭگەيدە ساقتالماۋى سەبەپ بولعان. تۇرعىنداردىڭ باسىم بولىگى ءالى دە اراقاشىقتىقتى ساقتاۋ، قول گيگيەناسى مەن ماسكا تاعۋ سىندى ساقتىق شارالارىن ەلەمەي وتىر.