15:15, 22 - ماۋسىم 2020 | GMT +5
نۇر-سۇلتاندا كەشە كوپقاباتتى ۇيدەن قۇلاعان جىگىت كوز جۇمدى
نۇر-سۇلتان. قازاقپارات - نۇر-سۇلتاندا 1989 -جىلى تۋعان جىگىت كوپقاباتتى ۇيدەن قۇلاپ كوز جۇمدى، دەپ حابارلايدى قازاقپارات ءتىلشىسى قالالىق قوعامدىق دەنساۋلىق ساقتاۋ باسقارماسىنا سىلتەمە جاساپ.
«21-ماۋسىم كۇنى كەشكى ۋاقىتتا قالالىق جەدەل مەديتسينالىق جاردەم ستانسياسىنا كوپ قاباتتى عيماراتتان قۇلاعان ەر ادام تۋرالى قوڭىراۋ ءتۇستى. دارىگەرلەر توبى دەرەۋ وقيعا ورنىنا جەتتى. 1989 -جىلى تۋعان ەر ادام №2-كوپسالالى قالالىق اۋرۋحاناعا جەتكىزىلدى. وكىنىشكە قاراي، العان اۋىر جاراقاتى سالدارىنان ول قايتىس بولدى»، - دەپ حابارلايدى باسقارمادان. ءدال سول كۇنى سول مەكەنجايدا تاعى ءبىر وسىنداي وقيعا تىركەلگەن.
«كوپ قاباتتى ۇيدەن ايەل ادام قۇلاعان. 1986 -جىلى تۋعان ايەل №2-كوپسالالى قالالىق اۋرۋحاناعا جەتكىزىلدى. ونىڭ جامباس سۇيەگى سىنعان. باس سۇيەك- مي جاراقاتىن العان. بارلىق قاجەتتى مەديتسينالىق كومەك تولىق كورسەتىلدى، ول پالاتادا جاتىر»، - دەلىنگەن حابارلامادا.
اۆتور: ايان بەكەن ۇلى
