تۇرعىن ءۇي كەشەنىندە بولعان جارىلىس: ءۇش ادام ءالى تابىلماي جاتىر

كيەۆ. ۋكرينفورم - قازاقپارات - كيەۆتە پوزنياكتاعى جارىلىستان كەيىن ءۇش ادامنىڭ تاعدىرى ءالى بەلگىسىز كۇيدە قالىپ وتىر.

بۇل تۋرالى كيەۆ مەرى ۆيتالي كليچكو وقيعا ورنىندا جۋرناليستەرگە مالىمدەدى، دەپ حابارلايدى قازاقپارات ۋكرينفورمعا سىلتەمە جاساپ.

«قۇتقارۋشىلار تاۋلىك بويى جۇمىس ىستەيدى جانە مۇنداي جاعدايدا جۇمىس ىستەۋگە قاجەت بارلىق جابدىق بار. قايتا وپىرىلىپ قالماۋ ءۇشىن ءۇيدىڭ 1-2- قاباتتارىندا بەكىتۋ ارقالىقتارىن مونتاجداۋدى اياقتادىق. سونداي-اق، ماماندار كورشى ۇيلەردى تەكسەرىپ جاتىر. ادامدارعا قاۋىپ توندىرمەۋ ءۇشىن ولاردىڭ قانداي كۇيدە ەكەنىن ناقتى ءبىلۋىمىز قاجەت»، - دەدى كليچكو.

اگەنتتىكتىڭ حابارلاۋىنشا، 21- ماۋسىمدا ساعات 10:00 دە كيەۆتىڭ دارنيتسكي اۋدانىنداعى كوشەلەردىڭ بىرىندە ورنالاسقان ون قاباتتى تۇرعىن ۇيدە گاز جارىلىپ، سالدارىنان بەسىنشى، التىنشى، جەتىنشى جانە سەگىزىنشى قابات وپىرىلىپ قيراعان. ۇيدەن 23 ادام ەۆاكۋاتسيالانعان. تاعى ءۇش ادام ءۇيىندى استىنان شىعارىلدى.

وقيعا ورنىندا توتەنشە جاعدايلاردى جويۋ جونىندەگى شتاب، توتەنشە جاعدايلار جونىندەگى مەملەكەتتىك قىزمەتتىڭ جەدەل موبيلدى توبى مەن ۇلتتىق پوليتسيا قىزمەتكەرلەرى جۇمىس ىستەۋدە.

جارىلىس فاكتىسى بويىنشا كيەۆ پروكۋراتۋراسىندا ۋكراينا قىلمىستىق كودەكسىنىڭ 270-بابى 2- تارماعى نەگىزىندە قىلمىستىق ءىس اشىلدى. پرەمەر-مينيستر دەنيس شمىگال جاعدايدى جەكە باقىلاۋىنا الدى.