الماتىداعى گوسپيتال باسشىلىعى: بۇگىنگىنىڭ باتىرلارى - اق حالاتتى ابزال جاندار
مەكەمەنىڭ 29 قىزمەتكەرى ءتوس بەلگى تاعىپ، العىس حات الدى، دەپ حابارلايدى قازاقپارات.
مەكەمە باسشىسى دامير داۋلەتبايەۆ ارىپتەستەرىن شىن جۇرەكتەن قۇتتىقتاپ، جۇرەكجاردى لەبىزىن ءبىلدىردى.
«ءبىزدىڭ حالىق باسىنان نە وتكىزبەدى؟ سوناۋ اشارشىلىق زامانىندا دا اتا-بابالارىمىز مويىمادى. جەرىمىزدى قورعاپ، ەلىنە قورعان بولا ءبىلدى. وتان سوعىسى جىلدارى مەن اۋعان سوعىسىندا وت پەن وقتىڭ ورتاسىندا قان كەشە ءجۇرىپ، كۇرەستى. قيىن-قىستاۋ زاماندا جارالانعانداردى ارقالاپ، كومەك كورسەتىپ، جانىنىڭ اراشاشىسى بولا بىلگەن، ارينە ول - مەديتسينا قىزمەتكەرى. چەرنوبىل اپاتى مەن سەمەي پوليگونىنان زارداپ شەككەندەرگە دە ەڭ العاشقىلاردىڭ ءبىرى بولىپ دارىگەرلەر كومەك قولىن سوزدى. بيىل ەلىمىزدە جاريالانعان توتەنشە جاعداي كەزىندە العى شەپتە ايانباي ەڭبەك ەتىپ جۇرگەن دە - دارىگەرلەر. ولاي بولسا، وسى ءتول مەرەكەلەرىڭىزدە سىزدەر، قانداي اتاققا دا، ماراپاتقا دا لايىقسىزدار. ەڭ باستىسى، دەندەرىڭىز ساۋ، وتباسىلارىڭىز امان بولسىن»، - دەدى ول.
كەش سوڭىندا گوسپيتال قىزمەتكەرلەرى مەرەكەلىك ءان تىڭداپ، ەستەلىك سۋرەتكە ءتۇستى.
«مەنىڭ دارىگەر ماماندىعىن تاڭداۋ سەبەبىم - انام 40 جىل ءومىرىن مەديتسيناعا ارنادى، 40 جىل دارىگەر بولىپ، ەلىنە قىزمەت ەتتى. سودان ويلانا كەلە، جوعارعى سىنىپقا كوشكەن جىلدارى مەن دە نەگە دارىگەر بولماسقا دەپ شەشىم قابىلدادىم. باعىم جانىپ، مەديتسينالىق ينستيتۋتقا وقۋعا ءتۇستىم. جالپى ءبىزدىڭ وتباسىمىزدى «مەديتسينالىق وتباسى» دەپ اتاۋعا بولادى. ويتكەنى، بۇگىنگى تاڭدا 8 دارىگەر بارمىز. كەلىن بار، قارىنداسىم بار، ءىنىم بار دەگەندەي. بارلىعى دا مەديتسينانىڭ بىلىكتى ماماندارى»، - دەدى وتان سوعىسى مۇگەدەكتەرىنە ارنالعان رەسپۋبليكالىق كلينيكالىق گوسپيتال ديرەكتورىنىڭ ورىنباسارى ەرلان شاحان ۇلى.
حالقىمىزدىڭ باسىنا تۇسكەن سىن ساعاتتا، ياعني توتەنشە جاعداي جاريالانعان كۇننەن-اق، دامير داۋلەتبايەۆ باسشىلىق ەتەتىن وتان سوعىسى مۇگەدەكتەرىنە ارنالعان رەسپۋبليكالىق كلينيكالىق گوسپيتال ۇجىمى ءبىراۋىزدان كومەكتەسۋگە بەل شەشە كىرىستى.
«دۇنيەجۇزىلىك پاندەميا بولىپ جاتقان تۇستا، بىزدە ەش تاڭداۋ بولمادى. ناۋقاستاردى قابىلداپ، كومەگىمىزدى اياماي، جاردەم بەرسەك دەگەن ويدا بولدىق. قيىنشىلىقتار بولمادى ەمەس - بولدى، تۇسىنىسپەۋشىلىكتەر دە بولدى. ەڭ العاش مىسىردان كەلگەن 100 ادامنىڭ ءارقايسىسى ءارقانداي ويدا بولىپ، ەلدە بولىپ جاتقان توتەنشە جاعدايدى تۇسىنبەدى. كارانتين دەگەندى بىلمەيدى. ال كەيبىرى ءتىپتى، قورىقتى. ەڭ قىزىعى، كەيبىرەۋى ءبىزدى قاماپ قويدىڭدار دەپ، قارسى شىعىپ، قورقىتۋعا تىرىستى. ءبىراق ءبىزدىڭ قىزمەتكەرلەر ءبارىن ءتۇسىندى، ساقاداي-ساي دايىن تۇردى. ءبىرىنشى تالاپ، كەلىپ تۇسكەندەردىڭ كوڭىلىن اۋدارا، پانيكالىق سەزىمدەرىن بولدىرماۋ جانە مورالدىق تۇرعىدا كومەكتەسۋ بولدى. گوسپيتالدەگى اۋىزبىرشىلىك تانىتقان ارىپتەستەرىمە ريزاشىلىعىمدى بىلدىرەمىن. حالقىمىزدىڭ سەنىمىن اقتادىق دەگەن ويدامىن. ەندى بولاشاقتا دارىگەرلەرگە سەنىمسىزدىك تانىتىپ، سىن ايتۋشىلاردىڭ قاتارى ازايىپ، كوزقاراستارى وزگەرەدى دەپ ويلايمىن. ءار دارىگەردىڭ، ءار قىزمەتكەردىڭ ورنى بولەك. دارىگەرلەر وراسان زور ەڭبەك ەتتى. ءبىراز ادامنىڭ پاندەميا كەزىندە كوزى جەتىپ، دارىگەرلەرگە دەگەن سەنىمى ارتقانىنا سەنىمدىمىن» - دەدى گوسپيتال ديرەكتورىنىڭ ورىنباسارى ەرلان شاحان ۇلى.
